Refuzimi i hetimit parlamentar për Bechetti, Rushaj: PS po mbron Ramën

Kreu i Grupit Parlamentar demokrat, Alfred Rushaj, sqaroi sot për mediat qëndrimin e socialistëve lidhur me kërkesat e PD për ngritjen e 3 komisioneve hetimore parlamentare, që do të shqyrtohen në seancën parlamentare të së enjtes.

E ndërsa për Komisionin hetimor për Zgjedhjet, socialistët kanë dhënë një dakordësi, Rushaj tha se për Inceneratorët nuk ka dakordësi, ndërsa kundërshtohet plotësisht kërkesa e tretë lidhur me hetimin e çështjes Bechetti.

“Duket që pala tjetër është duke shqyrtuar propozimet tona dhe do të vijë përpara seancës sot dhe nesër, për të shkuar në një objekt të dakordësuar.

Ndërkohë, duket që ka një vendim të palës tjetër për të mos pranuar ngritjen e Komisionit Hetimor “Becchetti”.

Justifikimi për këtë është një letër që paska sjellë Avokati i Shtetit dhe socialistët thonë që ngritja e Komisiionit Hetimor “Bechetti”, që do të hetonte përse shqiptarët do të paguajnë thuajse 120 milionë euro, është kundër interesit të Shqipërisë. Në fakt mosngritja e këtij Komisioni është në interes të Edi Ramës.

LEXO EDHE  Ministri përmendet në përgjimet e policëve të arrestuar

Është e turpshme që PS barazon interesin e shqiptarëve me interesin e Edi Ramës dhe disa nëpunësve të tij. Kjo në shkelje të plotë Kushtetutës, në shkelje të plotë të vendimeve të qarta të Gjykatës Kushtetuese të cilët kanë krijuar jurisprudencë të qartë për çdo aspekt të këtij Komisioni.

Natyrisht ne nuk do e pranojmë këtë pjesë, do të bëjmë çfarë ne kemi në dorë, çfarë ne kemi mundësi të bëjmë që ky Komision të ngrihet dhe shqiptarët ta dinë se përse do të paguajnë 120 milionë euro”, tha Rushaj.