Ministria e Jashtme ruse ka dhënë një deklaratë zyrtare me anë të zëdhënëses, Maria Zackarova, ku komenton deklaratën e kryeministrit shqiptar Edi Rama, i cili sipas tyre, ka folur për një bashkim të mundshëm të Kosovës dhe Shqipërisë.
“Ne e konsiderojmë deklaratën e kryeministrit shqiptar Edi Rama për bashkimin e Shqipërisë me Kosovën plotësisht të papranueshme. Promovimi i planeve për krijimin e një ‘Shqipërie të Madhe’ bie ndesh plotësisht me Rezolutën 1244 të OKB -së dhe minon stabilitetin në rajon”, thuhet në reagim.
Deklarata vijon duke thënë: “Është e çuditshme se ky unifikim është cilësuar si ambicia finale e karrierës të liderit të një prej vendeve të Ballkanit, që nuk shkon me promovimin e tentativave të Tiranës dhe Beogradit për krijimin e një tregu të përbashkët, në kuadër të Open Balkans”.
Ministria e Jashtme ruse fton vendet “që mbrojnë Kosovën” që të reagojnë lidhur me deklaratën e Ramës, ndërkohë që sipas saj, nuk i kursejnë Beogradit kritika për konceptin e “paqes serbe: “Shpresojmë të shohim një përgjigje adekuate nga kuratorët perëndimorë të projektit të ‘shtetësisë’ së Kosovës ndaj këtij provokimi të pacipë. Ne jemi jashtëzakonisht të befasuar që ata po i lejojnë këto lloj thirrjesh përçarëse, ndërsa sulmojnë Beogradin për konceptin e tij të justifikuar humanitar të Serbisë Botërore që nuk bie ndesh me të drejtën ndërkombëtare”.
DENONCO