Nga BoldNews.al
Porti i Durrësit është kthyer në një minierë ari, teksa ka “ushqim” për të gjithë. BoldNews.al ka ndjekur në vijimësi shpenzimet që ka kryer drejtoria e këtij porti, apo edhe vendimmarrjet tepër të dyshimta për të dhënë me “koncesion” apo qira ambiente të tëra nga kjo pasuri e të gjithë shqiptarëve.
Disa javë më parë ne raportuam se një firmë, pa asnjë investim, do të merrte në përdorim për 5 vite Terminalin e Kontenierëve. Ndërkohë, fitimi minimal, pa futur dorën në xhep e kësaj kompanie, arrinte deri në 30 milionë euro. Por, pak javë pas këtij “koncesioni”, drejtori Pirro Vengu i bëri një “dhuratë” kësaj firme, teksa i serviri një vinç 4 milionë euro. Por, jo me 30 milionë eurot që do të fitonte kompania, por me paratë e vetë Autoritetit Portual të Durrësit. Ndërkohë, “dhuratat” kanë vijuar.
BoldNews.al ka siguruar dokumentet e një tjetër tenderi që po kryen Autoriteti Portual i Durrësit. Pirro Vengu ka urdhëruar hapjen e një procedure me objekt “blerje vinçi të përdorur për nevoja të APD-së”. Fondi limit është 125.969.000lekë pa TVSH ose 1.036.325 EURO pa TVSH. Sipas dokumentit, kohëzgjatja e kontratës është 1 muaj nga dita e nënshkrimit të kontratës, ndërsa ofertat do të hapen në datën 10 nëntor 2021.
“Kjo procedurë prokurimi ka për qëllim blerjen një vinçi MHC (Mbile Harbour Crane) për Autoritetin Portual Durrës. Vinçi do të dorëzohet plotësisht i montuar dhe testuar në ambientin e Autoritetit Portual Durrës. Testet, provat, trajnimet si dhe dokumentacioni teknik që do përgatitet nga operatori ekonomik fitues do të jenë të detajuara”, thuhet në dokument.
Por, ku do të vendoset? Në dokumentet shoqëruese thuhet se vinçi do të vendoset në Terminalin e Kontenierëve. Por, a nuk u dha me “koncesion” ky terminal? A nuk bleu APD-ja për nevoja të firmës “koncesionare” një vinç 4 milionë euro pak javë më parë? Dhe, a nuk duhet të investohet firma për blerjen e këtyre vinçave?
Natyrisht, kemi edhe plot pyetje të tjera, pasi paratë që duhet të shkonin në Buxhetin e Shtetit po shkojnë në llogaritë e firmës private. Në fillim të vitit 2021, Porti i Durrësit dha me koncesion 5 -vjeçar një nga terminalet më fitimprurës, ai i Kontenierëve. Më saktë, biznesi i ngarkim- shkarkimit, ku me disa mjete të trashëguara, Porti i Durrësit fitonte dhjetëra miliona euro në vit. Por, këtë shërbim e ka marrë privati prej disa muajsh, ndërsa në dokumentet e publikuara në atë kohë, privati do të bënte vetëm një investim 300 mijë dollarësh.
