Gazetari Arian Çani tha se ambasadorja amerikane Yuri Kim është shprehur e habitur nga mbështetja që Sali Berisha po provon se ka në bazë.
Çani shtoi se një mbështetje e tillë e ka karakterizuar gjithmonë Berishën.
“Më thanë që ambasadorja i kishte thënë dikujt, “po na surprizon edhe ne, nuk e prisnim këtë mbështetje për Berishën”.
Në fakt, ai po surprizon të madh e të vogël. Duket që nuk kanë ardhur angari. Ka ovacione. Berisha ka sharm dhe karizmë. Turma e do. Po çfarë është turma? Njësi të vogla individësh, pra mbështetje”, tha Çani gjatë një bisede në studion e lajmeve në MCN TV.
Çani tha se prej javësh, Berisha rri në krye të listës së interesit publik.
“Kjo nuk është luftë për demokraci. Kjo fjalë përdoret shpesh për të mbuluar gjëra të tjera. Sa herë që janë në hall, përdorin fjalën demokraci. Në thelb është luftë për pushtet. Merrni 150 veta dhe çojini në plazhin më të bukur në botë. Pas një muaji do të gjeni një lider, dhjetë njerëz që i shkojnë mbrapa dhe të tjerët të mbaruar që nuk mund të bëjnë asgjë.
Berisha është në betejën e tij finale. Vendosi të mos ikte kokulur. Kjo është beteja finale dhe çdo gjë që bën i lejohet. Është një rast i paprecedent. Duhet shfletuar historia moderne për të parë nëse amerikanët kanë goditur kështu herë tjetër. Kam përshtypjen që sot është një goditje e rrallë”, tha ai.
