Faqja në Instagram e PPE (EPP), ka postuar foto të mbërritjes së Lulzim Bashës, kreut të PD-së, i cili merr pjesën ditën e sotme në samitin e PPE-së. Basha në mesazhin e tij ka vënë theksin te situata në Rajon, veçanërisht pas tensioneve në kufirin Serbi-Kosovë.
Basha tha se do të hyjmë në një epokë të re të bashkëpunimit dhe zhvillimit
“Ngjarjet e fundit në kufirin Kosovë-Serbi dhe në Malin e Zi, tregojnë se sa e brishtë mbetet paqja dhe stabiliteti në këtë rajon.
Remineshencat e një të kaluare jo shumë të largët, të përziera me interesa gjeo-strategjike të fuqive jo-perëndimore, janë një fitil që mund të ndizet nga momenti në moment.
Siç e dimë të gjithë, problemet e pazgjidhura shumë lehtë mund të kthehen në kriza.
Kjo është arsyeja pse është jetike për BE-në që të përqëndrojë energjinë e saj drejt marrëveshjes përfundimtare të njohjes reciproke midis Kosovës dhe Serbisë”, tha kreu demokrat.
Sipas tij, për ta arritur këtë, njohja e Kosovës nga 5 Shtetet Anëtare të mbetura duhet së pari të përfundojë.
“Asnjë paralelizëm nuk mund të bëhet, asnjë argument nuk mund të justifikojë mosnjohjen e pavarësisë së Kosovës, përderisa Gjykata Ndërkombëtare e Drejtësisë e ka certifikuar atë
Vetëm në këtë mënyrë, Ballkani Perëndimor do të hyjë në një epokë të re të bashkëpunimit dhe zhvillimit, e cila me siguri do të jetë një vlerë e shtuar për BE-në”, tha Basha.
Kryetari i Partisë Demokratike të Shqipërisë, Lulzim Basha, po merr pjesë në samitin e PPE, që hapi punimet në orën 16.00 të ditës së sotme.
Në mëngjes Basha postoi në Facebook një videomesazh i cili do të përcillet në Samit.
