Mediat greke kanë publikuar momentin e atentatit ndaj shqiptarit Dikenc Halili, që në shtetin helen njihej me emrin Kristo. 39-vjeçari nga Tepelena, u qëllua për vdekje me 2 plumba në kokë e një në bark mbrëmjen e djeshme në një lokal të Athinës, ku dhe po konsumonte një pije.
Në videon e publikuar shihet shqiptari i ulur në bar, ndërsa i afrohet një tjetër person, që nxjerr armën dhe e qëllon. Të pranishmit në bar largohen me shpejtësi nga vendi i ngjarjes, pas të shtënave.
Shqiptari u dërgua me plagë të shumta në spital, ku dhe ndërroi jetë. Ai menaxhonte një lokal në kryeqytetin grek ku dhe ftonte këngëtarë të njohur.
Dyshohet se në atentat janë përfshirë më shumë se një person. Fill pas krimit, autorët janë larguar nga vendi i ngjarjes me një mjet tip ‘Toyota Yaris’, ndërkohë që policia ka nisur hetimet për identifikimin dhe kapjen e tyre.
Po ashtu, raportohet se viktima është me precedentë penale, ndërkohë që një prej pistave të krimit dyshohet për larje hesapesh, shkruajnë mediat vendase.
