Kombëtarja Shqiptare nisi sot grumbullimin për eliminatoret Katar 2022, ku do të përballet me Hungarinë e Poloninë në harkun e tre ditëve.
Trajneri Edi Reja ka publikuar së fundmi listën e futbollistëve që do të ketë në dispozicion për këto dy ndeshje, ku bie në sy rikthimi i mbrojtësit të krahut, Ivan Balliu, i cili aktivizohet te Rayo Vallecano, por mungojnë dy mesfushorë si Laçi e Abrashi, për arsye dëmtimi.
Gjatë ditës së sotme pritet që të gjithë futbollistët të mbërrijnë në kompleksin “Tropikal”, ku grumbullohet tashmë thuajse gjithmonë kombëtarja shqiptare.
Tekniku Reja i cilësoi si decizive ndeshjet me Hungarinë dhe Poloninë.
“Për mua është e rëndësishme që ekipi po rritet ndeshje pas ndeshjeje. Synimi ynë është që të arrijmë në play off, por një humbje do na largojë nga ëndrrra jonë, ndaj është e rëndësishme që të marrim rezultate pozitive”, tha Reja.
I pyetur nëse janë shumë 11 mbrojtës të thirrur për të marrë rezultatet pozitive, tekniku Reja tha se ka marrë dy lojtarë për çdo pozicion, të cilët do të provohen.
Reja tha se aktualisht kemi 1 javë në dispozicion për të parë grupin e lojtarëve dhe kjo është gjë e mirë.
“Mendova të mbledh sa më shumë lojtarë pasi kemi më shumë kohë për ti provuar. Manaj? Ai po aktivizohet te Spezia, por duhet edhe disa kohë për të parë gjendjen e tij”, tha Reja.
Fluturimi i kuqezinjve për në Hungari është planifikuar për paraditen e të premtes, një ditë para ndeshjes, teksa në “Ferenc Puscac” do të mbahet një seancë stërvitore dhe konferenca zyrtare për shtyp e trajnerit dhe kapitenit.
Sfida ndaj maxharëve do të zhvillohet të shtunën në orën 20:45, ndërsa menjëherë pas ndeshjes, pritet që delegacioni i kuqezinjve të fluturojë menjëherë drejt Shqipërisë.
Destinacioni do të jetë sërish kompleksi “Tropikal” në Durrës, ku skuadra do të qëndrojë deri të martën pasdite, për t’u nisur më pas drejt kryeqytetit, ku në “Air Albania” do të përballet me Poloninë e Robert Lewandowskit.
Shqipëria aktualisht renditet në vendin e dytë të grupit I, me 12 pikë në 6 ndeshje dhe për të ruajtur këto pozita, duhet të marrë maksimumin nga dy përballjet me Hungarinë e Poloninë, të cilat janë edhe rivalet direkte për t’u pozicionuar pas Anglisë.
