Agjencia Europian e Barnave ka miratuar përdorimin e një doze të tretë përforcuese të vaksinës Pfizer për të gjithë personat nga 18 deri në 55 vjeç.
Nëpërmjet një njoftimi zyrtar EMA thekson komiteti për ilaçet që funksionon pranë kësaj agjencie ka arritur në përfundimin se një dozë shtesë e kësaj vaksine tek personat e kësaj grupmoshe me sistem imunitar normal rrit nivelin e antitrupave kundër koronavirusit. Por agjencia rekomandon që doza e tretë për këta persona të jepet vetëm 6 muaj pas marrjes së dozës së dytë.
EMA bën të ditur gjithashtu se po monitorohen me kujdes efektet anësore që mund të shkaktojë marrja e një doze të tretë, pasi siç thekson në njoftimin e saj, rreziku i sëmundjeve inflamatore të zemrës ose efekteve të tjera anësore shumë të rralla pas një përforcuesi nuk dihen ende.
Gjithsesi autoritet më i lartë për barnat në Bashkimin Europian thotë se tashmë organet e shëndetit publik të çdo vendi mund të japin rekomandime zyrtare për përdorimin e dozave përforcuese, duke marrë parasysh të dhënat e reja të efektivitetit.
Komiteti i ilaçeve të EMA-s ka arritur gjithashtu në përfundimin se një dozë shtesë e vaksinave COVID-19 Pfizer dhe Moderna mund t’u jepet njerëzve me sistem imunitar të dobësuar, të paktën 28 ditë pas dozës së tyre të dytë.
Rekomandimi vjen pasi studimet treguan se një dozë shtesë e këtyre vaksinave rrit aftësinë për të prodhuar antitrupa kundër virusit që shkakton COVID-19 tek këta pacientë.
