Jawsackie Jaboah nga Gana, pasi është sulmuar me thikë nga bashkëjetuesi i saj shqiptar Kliton Pira, ka zbritur nga kati i tetë i pallatit ku kishin pronotuar një apartament me qera pranë shkollës 9-të vjeçare “Pjetër Budi”.
Nga hyrja e apartamentit që kishin pronotuar vetëm 3 orë më parë se të ndodhte krimi, deri në rrugën kryesore të lagjes ka zbritur duke u zvarritur dhe ulëritur. Banorët pohojnë se nga skena janë tmeruar edhe fëmijët.
Dyshohet se ganezja ka mbërritur në Tiranë pas një krisje mes çiftit dhe për t’u sqaruar, por takimi mes tyre ka qenë tragjik. Policia ka sekuestruar kamerat e sigurisë që ndodhen në ambientet e jashtme të pallatit të cilat kanë filmuar një pjesë të asaj ç’ka ndodhur.
Edhe pse kanë kaluar më shumë se 12 orë nga krimi i rëndë, gjurmët e gjakut janë prezente në të gjithë pallatin.
Historia nisi për interes dhe vijoi me dedikime romantike
Kliton Pira 26 vjeç, kishte 3 vite që jetonte në Angli. Ai kishte kaluar me kamion në shtetin ishullor në mënyrë të paligjshme, ndërsa kishte bërë lidhje martesore me shtetasen Jawsackie Jaboah, për dokumenta ndërsa historia e tyre u kthye edhe në një histori dashurie nga sa provohet përmes postimeve në rrjetet sociale.
Burime i thanë Fax News se Klitoni rreth 3 vite më parë, sapo kishte mbërritur në Angli kishte humbur edhe babain. Zyrtarisht u njoftua si vetëvrasje, por që familjarët dyshuan se ishte vrarë. Ai ishte në hasmëri me një familje tjetër në rrethana ende të panjohura.
Genci Pira babai i 26 vjeçarit u njoftua nga policia se ishte gjetur i vetëvarur në zonën e Korçës. Ai ishte nisur përmes kufirit të gjelbër të kalonte në mënyrë të paligjshme pasi punonte me sezone atje. Madje edhe i biri para se të shkonte në Angli, udhëtonte drejt Greqisë me të atin ku punonin me sezone kryesisht në bujqësi. Familja Pira me origjinë nga Dibra jetonin prej rreth 30 vitesh në zonën e “Don Boskos” në Tiranë, ku tanimë qëndron vetëm e ëma pasi edhe vëllezërit e tij jetojnë jashtë vendit.
Një burim i tha Fax News se Klitoni e kishte përjetuar dramatikisht humbjen e të atit. Ai kishte ndërprerë kontaktet me shoqërinë në Tiranë por edhe me ata që e ndihmuan apo shoqëruan drejt Anglisë. Vdekja e babait u konsiderua si vetëvarje, ndonëse në polici familjarët kishin deklaruar dyshimet e tyre për vrasje për shkak të hasmërisë.
