Ka një krisje të madhe mes dy klubeve dhe FSHF-së. Gjatë tri javëve të para të këtij sezoni, Partizani dhe Teuta kanë refuzuar të vendosin në fanellë logon e re të “Abissnet Superiores”.
Nuk dihet nëse kjo ka të bëjë me sponsorin e ri apo është thjesht një protestë e heshtur kundër FSHF-së, por qartazi kjo vë në diskutim ekzistencën e Ligës Profesioniste, por jo vetëm.
Mjafton t’i shohësh vendimet e fundit të Komisionit të Disiplinës për të kuptuar se Partizani me Teutën vazhdojnë ta injorojnë kërkesën e FSHF-së për të vendosur logon e re dhe për këtë arsye po gjobiten nga Disiplina çdo javë me 500 mijë lekë të vjetër. Gazeta është interesuar pranë të dy klubeve për të marrë një informacion zyrtar në lidhje me vendimin e tyre, por asnjë nuk ka reaguar. Thjesht kanë vendosur t’i pranojnë gjobat në heshtje.
Nga ana tjetër, kjo vë në pikëpyetje të mëdha mënyrën se si po funksionon Liga Profesioniste. Nëse një vit më parë klubet ishin unanimisht dakord për të bojkotuar kampionatin, tani situata është shumë e nderë. Klubi kampion, Teuta, refuzon të mbajë logon e Superiores dhe të sponsorit të ri. Partizani, gjithashtu preferon gjobën në vend të respektojë rregulloren.
