Java e katërt e Kategorisë së Parë ka konfirmuar përsëri Bylisin si ekipin për t’u mundur dhe kandidatin kryesor për ngjitjen përsëri në elitën e futbollit shqiptar. Skuadra ballshiote ka likuiduar Pogradecin me shifrat 1-2 në transfertë dhe vazhdon të jetë ekipi i vetëm në kreun e klasifikimit me pikë të plota.
Pas javës së katërt, skuadra ballshiote ka 12 pikë falë 4 fitoreve që ka siguruar, me një golavarazh 9-1 që tregon se si ekipi i Beqirit është në rrugën e duhur për t’u kthyer shpejt në elitë.
Pas krahëve të ballshiotëve, renditja sheh aktualisht një grup prej tre skuadrash në ndjekje me Korabin në kuotën e 10 pikëve, Shkumbinin me 9 dhe Tërbunin me 8 pikë. Më të shkëputura janë skuadra të tjera si Erzeni e Butrinti që janë ndalur në kuotën e 6 pikëve.
Ajo që bie në sy në renditjen e kampionatit është se skuadra me pretendime si Apolonia e Lushnja, gjenden shumë poshtë, në kuotën e 4 pikëve, ndërsa Pogradeci dhe Besëlidhja të cilët në edicionet e kaluara kishin pretendime për ngjitjen, e shohin vetën në vendet e fundit në klasifikim.
