Mesfushori i Barcelonës, Frenkie de Jong ka dalë kundër shkarkimit të trajnerit Ronald Koeman, pavarësisht humbjes 3-0 të së mërkurës ndaj Benfica në Ligën e Kampionëve. Duket një solidaritet holandezësh te Blaugranat, por vështirë të pijë ujë, sepse futbolli flet me rezultate.
De Jong sugjeroi se Koeman nuk ishte arsyeja pse skuadra e tij ka fituar vetëm një nga pesë ndeshjet e fundit dhe ka startin më të keq të Ligës së Kampionëve që nga viti 2001. Koeman, ndërkohë, pranoi mbështetjen e lojtarëve të tij pas humbjes ndaj Benfica, ndërsa po përpiqet ta ndryshojë situatën
“Nuk mund të flas për Koeman, nuk është në tagrin tim kjo gjë, – u tha De Jong gazetarëve. – Unë nuk mendoj se ndryshimi i trajnerit mund të zgjidhë asgjë. Ne po provojmë gjithçka, po punojmë shumë në stërvitje, po përpiqemi të japim më të mirën në fushë, por sonte nuk ishte dita jonë, kjo është e qartë”.
Sergio Busquets u pajtua me shokun e tij të skuadrës, duke thënë: “Në fund, gjëja më e lehtë është shkarkimi i Koeman. Të gjithë kemi përgjegjësi, sepse jemi në një situatë kritike”. Koeman, ndërkohë, përshëndeti qëndrimin e lojtarëve të tij, ndërsa pranoi pasigurinë në raport me drejtuesit e klubit: “Ndihem i mbështetur nga lojtarët e mi dhe qëndrimi i tyre. Nuk di për pjesën tjetër. Nuk e di për klubin”.
