Kryetarja e Komisionit të Shëndetësisë Albana Vokshi ka denoncuar sot bllokimin nga administrata e Kuvendit të zhvillimit të mbledhjes së këtij komisioni. Në një deklaratë për mediat, Vokshi kërkoi që të merren masa urgjente, pasi kjo është një ngjarje e paprecedentë.
“Sot iu hoq e drejta e fjalës opozitës brenda komisionit parlamentar. Sot gazetarët nuk u lejuan të ndiqnin nga afër mbledhjen. Sot ka ndodhur edhe një ngjarje e rëndë ku i lihej kompetencë komisioneve. Unë dje kam njoftuar praninë fizike të deputetëve në mbledhje. Jo vetëm që nuk u mor asnjë masë, por jemi bllokuar edhe nga stafi i administratës së kuvendit që ka urdhëruar largimin e stafit të komisionit në mes të mbledhjes së komisionit ku i kisha dhënë fjalën deputetëve të komisionit. Kërkoj të merren masa urgjente për këdo që ka tentuar të minojë parlamentarizmin e paprecedentë që Kuvendi t’i mbyllë gojën opozitës, u urdhërua ndërprerja e transmetimit live. Na fshinë fare edhe nga faqja e FB dhe web e portal i Kuvendit sikur ne nuk ishim fare”, tha Vokshi për gazetarët, në një prononcim jashtë ambienteve të Kryesisë së Kuvendit.
Sipas Vokshit, mazhoranca ka frikë nga fjala e lirë dhe vepron me dy standarde. Me fakte dhe foto të përfaqësuesve të mazhorancës, Vokshi ka denoncuar para gazetarëve standardin e dyfishtë të qeverisë në lidhje me prezencën e tyre pa maskë në mbledhje qeverie e mbledhje të PS, ndërkohë që shtoi se me opozitën veprohet e kundërta.
“Ata kanë frikë nga fjala e lirë janë mësuar me kukulla e fasadë, por ta harrojnë se kjo do të ndodhë me PD. Sot harruan që kjo qeveri e mazhorancë kanë dy standarde për qeverisjen e vet dhe një standard tjetër për opozitën, që nuk duhet të duket në publik dhe nuk duhet të ketë të drejtë fjale. Ajo që ka ndodhur është që kjo qeveri dhe Rama ka frikë nga opozita. Ne do të jemi fizikisht në komision dhe do të përballemi në komision. PD do të vijojë betejën e saj për të treguar të vërtetat e dhimbshme në të gjitha komisionet”, tha ajo.
