Milani pas shumë vitesh rikthehet në “San Siro” për të luajtur një ndeshje Championsi por në fund nuk ia del. Kuqezinjtë e Piolit bëjnë një ndeshje të madhe ndaj Atl. Madrid në një provë karakteri ku me 10 lojtarë për 60 minuta ishin pranë fitores por në fund u përmbysën nga Atletico në sekondat e fundit.
Ishte Rafael Leao që i dha avantazhin kuqezinjve në minutën e 20’ por dalja me të kuqe e Kessie ia vështirësoi shumë ndeshjen Milanit dhe në 84’ ishte Griezmann që barazoi sfidën. Gjithsesi në sekondat e fundit në minutën e 97’, Suarez me një penallti zbehu ëndrrat kuqezi duke i dhënë 3 pikët “los colchoneros”.
Ndërkohë në ndeshjen tjetër të Grupit B, Liverpooli mori fitoren e dytë radhazi teksa dominoi Porton ashtu si vitet e kaluara me rezultatin 5-1. Salah dygolësh dhe Mane ishin autorët e golave në pjesën e parë teksa në të dytën një dygolësh i Firmono i dha suksesin skuadrës së Klopp në një fitore të rëndësishme në një grup shumë të fortë të Championsit. Në Grupin C, Dortmundi fitoi sërish madje pa Haaland në formacion, ku norvegjezi mungonte për shkak dëmtimi. 1-0 ishte rezultati i sfidës për verdhezinjtë ndaj Sporting Lisbon ku fatin e takimit e vendosi i riu Malen në 37’.
