Aldi Rama është 21-vjeçari i shpallur në kërkim si autor i dyshuar i vrasjes së oficerit të Krimit në Lezhë, Saimir Hoxha, këtë të Martë.
Pas krimit, në media është publikuar një fotografi e disa viteve më parë, ku i riu pozonte me kryeministrin Edi Rama.
Në foton e shpërndarë në rrjetin social FB, vëmendjen e tërheq komenti i një të afërmi të 21-vjeçarit, i cili thotë se Aldi është bërë shumë më i keq se Rama.
Në një foto tjetër, i riu shfaqet me armë zjarri.
Ngjarja
Efektivi i policisë Saimir Hoxha u qëllua për vdekje me armë zjarri gjatë një kontrolli territori për drogë. “Në rrethana ende të paqarta është qëlluar me armë zjarri në drejtim të grupit të kontrollit të territorit për parandalimin e kultivimit të bimëve narkotike. Si pasojë është plagosur me armë zjarri oficeri i Krimeve në Komisariatin e Policisë Lezhë shtetasi Saimir Hoxha, 44 vjeç, i cili për pasojë të plagëve të marra ka ndërruar jetë gjatë rrugës për në spitalin Rajonal Lezhë”, njoftoi policia.
Aldi Rama, 21 vjeç është identifikuar si autori i dyshuar i ngjarjes. I riu ka qenë i dënuar më parë për prodhim dhe shitje të narkotikëve dhe mbajtje pa leje të armëve të ftohta.
Burime policore thanë se sipas një rindërtimi paraprak të ngjarjes, një patrullë policia ka ndaluar një automjet. Nga makina është qëlluar me armë zjarri. I plagosur mbeti oficeri i Krimeve Saimir Hoxha. Babai i dy fëmijëve u dërguar në spital, por nuk mundi të mbijetojë.
Pamje nga vendngjarja
Kërkimi
Për kapjen e të riut janë të angazhuara dhe forca speciale të policisë, si dhe mjete ushtarake e helikoptërë. Makina e dyshuar se është ëprdotur nga i riu është gjetur e braktisur, ndërsa dyshohet se ai fshihet në një zonë të pyllëzur në Kune.
Referuar raportimeve mediatike, 21-vjeçari ka qëlluar me armë gjatë ndjekjes ndaj helikopterit të policisë, por ky informacion nuk është konfirmuar zyrtarisht nga policia.
Reagimet nga politika
Lidhur me ngjarjen reaguan dhe aktorë kryesorë politikë në vend.
Presidenti Ilir Meta u shpreh se “lufta kundër krimit të organizuar, trafikut të drogës dhe kanabizimit të Shqipërisë, që ka dëmtuar seriozisht vitet e fundit imazhin e vendit dhe ka marrë aq shumë jetë njerëzish, duhet të jetë një prioritet absolut dhe të mbështetet nga të gjithë”
PD e quajti ngjarjen “një tragjedi e paralajmëruar”. “Prej vitesh punonjësit e policisë që shërbejnë me ndershëmri në mbrojtje të rendit dhe sigurisë janë braktisur nga shteti i gjunjëzuar përpara krimit, i cili është në revansh për shkak të modelit të bashkëpunimit me krimin të frymëzuar nga ky regjim i korruptuar. Prej vitesh, Shqipëria e sunduar nga Edi Rama është kthyer në vendin kryesor të prodhimit të kanabisit në Europë, pasojat e këtij vullneti të mbrapshtë politik janë shkatërruese për shoqërinë dhe institucionet tona. Që krimi të mos guxojë, që rendi dhe siguria të kthehet në normalitet, zgjidhja që kemi përpara është vetëm një, ndarja përfundimtare e politikës nga krimi dhe ndëshkimi i modelit të ndërtuar nga Edi Rama, i cili ka shkaktuar dhe shkakton vetëm dhimbje dhe pasiguri në familjet shqiptare”, u shpreh deputeti demokrat, Enkeljed Alibeaj.
Ish-kryeministri Sali Berisha tha se efektivi i policisë u vra nga “narkobandat e qeverisë”:
“Oficeri i policise Sajmir Hoxha po kontrollonte per parcela droge ne Ishullin e Lezhes dhe u qellua per vdekje nga narkonbandite qe ruanin keto parcela te mbjella me inkurajimin direkt te Edvin Droges, i cili per qellime elektorale u zotua se do te legalizonte mbjelljen e Kanabisit si bime medicinale. Ai nxiti keshtu shumfishimin e siperfaqeve te mbjella por dhe te narkobandave te armatosura te lidhura me narkoqeverine e narkoshtetit dhe kreun e tij te meduzës”, u shpreh Berisha.
