Deri më tani në vendin tonë janë vaksinuar me dozën e parë 1 700 000 qytetarë kundër COVID. Kjo është bërë e ditur nga Kryeministri Edi Rama.
Ai u bën apel qytetarëve të marrin vaksinën për të mbrojtur shëndetin e tyre.
“Vaksinohu sot, mbro shëndetin. Vaksinat shpëtojnë jetë. 1 700 000 vaksinime kundër COVID”, shkruan Rama.
Qeveria nuk ka publikuar shifra se sa nga të vaksinuarit kanë marrv ato që konsiderohen si vaksinat e sigurta, Pfizer dhe AstraZeneca, që janë certifikuar nga EMA dhe CDC.
Në Shqipëri prej datës 1 shtator vijon muaji i hapur i vaksinimit për qytetarët mbi 18-vjeç.
Autoritetet kanë vendosur vaksinë me detyrim për ekipet mjekësore, stafet e arsimtarëve dhe studentët. Kjo masë pritet të hyjë në fuqi në fund të këtij muaji.
Në Shqipëri janë aplikuar krahas dy vaksinave të certifikuara nga CDC dhe EMA, Pfizer dhe AstraZeneca, edhe dy vaksina të tjera që nuk janë miratuar nga dy prej institucioneve më të rëndësishme në Botë. Sinovac dhe Sputnik V janë aplikuar që prej fillimeve të pandemisë, ndërsa për to OBSH ka dhënë vetëm një miratim për përdorim emergjent, ndërsa nga ekspertë të pavarur janë ngritur dyshime lidhur me mbrojtjen që ato ofrojnë.
