Florian Marku sot ka arritur të bëjë realitet një nga ëndrrat që kur nisi karrierën e tij si boksier profesionist.
Për 28-vjeçarin nga Lushnja, sot erdhi titulli i parë, brezi i Kampionit Ndërkombëtar të Federatës IBF për peshat e mesme.
Një sukses që erdhi me pikë në fund të 10 raundeve të luftuara dhe me një vendim gjyqtarësh që për pak sa nuk la të shtangur boksierin shqiptar i cili kishte dominuar që në start sfidën. Në momentin e leximit të pikëve, ai mbeti i ngrirë në vend kur dëgjoi se gjyqtaria i parë i kishte dhënë fitoren me diferencë rivalit të tij, Maksim Prodan.
Por qetësia u kthye pasi dy gjyqtarët e tjerë i dhanë suksesin Markut, duke e shpallur atë kampionin e ri dhe duke i dhënë Markut brezin e parë në karrierën e tij si profesionist.
Një moment që boksieri shqiptar e ka festuar, pasi është një mundësi që tani ai të fillojë të ngjitë hapat një nga një në ringun ndërkombëtar duke sfiduar kampionët që gjenden në shkallët më të larta të kësaj kategorie.
Pas ndeshjes Marku u shpreh:
“Urime Maksim, ishte një kundërshtar i vështirë, ai ishte i pamposhtur, 19-0, por unë nuk mund ta ndjeja forcën e tij.
Ai kishte fuqi, por unë po gjeja ritmin tim, nuk kisha asnjë lloj problemi ndaj mbaja distancën. Nuk mund ta gjuaja lehtë, ndaj mbaja distancë. Nëse gjuajtja për KO do të vinte, do të vinte.
Mesazhi që dërgoj është se me vetëm 10 ndeshje, unë u përballa me një kundërshtar në majë, me të cilin nuk përballej askush dhe e munda. Jam i ri në boks, të gjithë më nënvlerësonin se thoshin që jam një kikbokser dhe më shihni ku jam sot.
E shihni këtë brez, ky është fillimi për gjithçka, njerëzit nuk e dinë por kam sakrifikuar gjithë jetën. Gruaja ime është shtatzënë dhe po pres fëmijën e parë. Ndaj jam i shumë i gëzuar. Do t’ua bëj jetën e tyre më të mirë me këto tituj dhe duke fituar shumë para”, tha Marku.
