Gërdeci/ Apeli i Gjykatës së Posaçme kthen për rihetim dosjen ndaj Fatmir Mediut

Apeli i gjykatës së Posaçme kthen për rigjykim dosjen në ngarkim në ish-ministrit të Mbrojtjes Fatmir Mediu, lidhur me shpërthimin e ndodhur në Gërdec në vitin 2008.

Në muajin Mars, SPAK kërkoi rihapjen e hetimeve për Mediun pasi kallëzimit të familjarëve të një 6-vjeçari i cili humbi jetën gjatë shpërthimit. SPAK argumentoi se tanimë Mediu nuk ka imunitet, sikurse kur ndodhi ngjarja dhe mund të hetohet.

Megjithatë, kërkesa e prokurorisë u rrëzua nga Gjykata e Posaçme që argumentoi se prokuroria ka pasur të gjitha mundësitë që ta hetonte lirisht Fatmir Mediun pasi që prej 2012 ai nuk ka pasur imunitet, por nuk e bëri dhe në këto kushte vepra është parashkruar.

LEXO EDHE  VIDEO/ Me makina dhe flamuj, ja si e presin Berishën në Kavajë

SPAK apeloi vendimin në Apelin e Gjykatës së Posaçme, që këtë të Premte rrëzoi vendimin e shkallës së parë dhe vendosi rihetimin e çështjes, “duke i kthyer aktet Prokurorit të Posaçëm për të proceduar”.

Në rast rekursi të këtij vendimi nga ana e Mediut, do të ketë shqyrtim nga Gjykata e Lartë, që do të shprehet përfundimisht nëse dosja do të kalojë për rihetim. Në rast se nuk ka ankim, SPAK do të rinis gjykimin për ish-ministrin e Mbrojtjes, sipas vendimit të apelit.