Debate këtë të Enjte në Kuvend lidhur me zhvillimin e komisioneve parlamentare. Në seancë, pati ankesa nga deputetët e Partisë Demokratike, të cilët kërkuan që mbledhjet e komisioneve parlamentare të mos zhvillohen online, ashtu siç u vendos në Konferencën e Kryetarëve.
Ata sqaruan se në Konferencën e Kryetarëve u njohën me një shkresë të Mira Rakacollit – kryetare e Komitetit Teknik të Ekspertëve për pandemisë, që rekomandonte që komisionet parlamentare të zhvillohen online.
Deputeti demokrat Alfred Rushaj deklaroi se vendimi është antikushtetues dhe antiligjor. Duke iu referuar legjislacionit, ai shpjegoi se mbledhjet zhvillohen online në rastet kur është shpallur fatkeqësia natyrore apo gjendja e jashtëzakonshme.
Deputetja demokrate Jorida Tabaku u shpreh se zhvillimi i mbledhjeve online bëhet për ti mbyllur gojën opozitës.
Kundra vendimit u shpreh dhe deputeti tjetër demokrat, Enkelejd Alibeaj, i cili solli në kujtesë dhe mbledhjet online që u zhvilluan sesionin e kaluar parlamentar. “Njëri në plazh, tjetri me gotën e rakisë dhe askush s’merrte vesh nga publiku çfarë ishin duke diskutuar, çfarë ishin duke mbrojtur”, tha ai.
PD propozoi që deputetët të vaksinohen dhe gjendja t’i kthehet normalitetit, si dhe komisionet të zhvillohen në orare të ndryshme për të patur më shumë hapësirë.
Taulant Balla nga Partia Socialiste mbështeti vaksinimin e deputetëve, por kundërshtoi demokratët për mënyrën e punës së komisioneve. “Shqipëria është në kushtet e një pandemia dhe si e tillë dhe Kuvendi duhet të jetë shembulli i rekomandimeve që merr komiteti i ekspertëve. Kjo është një çështje që konferenca ka marrë një vendim dhe s’ka vend për diskutim në seancë”, tha ai.
Pas tij, foli Tritan Shehu i cili tha se vendimi nga Konferenca kryetareve është “tendencë për grusht shteti brenda parlamentit”. Shehu propozoi që opozita të bojkotojë komisionet parlamentare në rast se ato do të zhvillohen online.
Pas fjalës së deputetit të PD Shehu, kryetarja e Kuvendit Lindita Nikolla mbylli seancën parlamentare.
Seanca që zgjati rreth 30 minuta nisi me 1 minutë heshtje në kujtim të minatorit Muharrem Plaku, i cili humbi jetën në një minierë në Bulqizë disa ditë më parë. Kërkesa për mbajtjen e 1 minutë heshtjeje u bë nga deputetja e Partisë Demokratike në qarkun e Dibrës, Dhurata Çupi. Gjatë seancës, Kuvendi miratoi caktimin e përbërjes së komisioneve të përhershme të Kuvendit, si dhe caktimin e anëtarëve zëvendësues në përbërjen e komisioneve të përhershme.
/BN/
