Damian Gjiknuri, i emëruar Sekretar i Përgjithshëm në Partinë Socialiste, dhe i konsideruar si një nga njerëzit e besuar të Kryeministrit Edi Rama, duket se mund të prodhojë përplasjet e reja në këtë parti.
Ndoshta kjo ka qenë arsyeja që Rama vendosi të zhvendosë Taulant Ballën si numrin 2 të PS, duke vendosur në këtë pozicion Gjiknurin, i konsideruar si “krahu i djathtë” i kreut socialist, veçanërisht në qarkun e Vlorës, në zgjedhjet e fundit parlamentare.
Në “Zona Zero”, Gjiknuri foli lidhur me riorganizimin e PS, duke vënë theksin në atë se strukturat nuk mund të nisin përgatitjet për zgjedhje në momentet e fundit.
“Vendosja e një kryetari të ri në qarqe është nevoja për të qarkulluar lidership në nivel lokal, sepse i jep PS rifreskim dhe të bëjë më mirë në vijim. Mandati i tretë ka dhe konsumin e saj, duket sikur mandati i tretë mund të sjellë një konsum të mëtejshëm dhe mund të mos realizojë premtimet, por prandaj duhet që strukturat e PS të punojnë sa më shumë, të merremi me çdo shqetësim që krijohet gjatë rrugës dhe të mos presim gongun e fushatës,” tha Gjiknuri.
Caktimin në Qarkun e Elbasanit si drejtues politik, Gjiknuri e shpjegoi me faktin se në këtë qark është rikthyer, pasi karrierën politike e ka nisur pikërisht në Elbasan, ku edhe mori mandatin e parë të deputetit.
Por, Gjiknuri ka porositur Ballën që të mos hedhë poshtë karrierën politike për një kaprico personale, duke lënë të kuptohet se diçka nuk shkon mes palëve.
“Balla ka bërë një punë të mirë në Elbasan, tani është vendosur në një qark tjetër për të drejtuar, sepse kjo është bërë edhe për arsye të politikave të PS brenda partisë, për një rifreskim të qarqeve. Megjithatë do i thoja që mos të hedhë poshtë të gjithë karrierën politike për një kapriço personale”, tha Gjiknuri.
Duke folur për kritikat e Erion Braçes, Gjiknuri tha se ai ka fizionominë e tij të të bërit politikë.
“Ndoshta Braçe ka pasur pritshmëri më të larta se sa detyra që kishte si zv.Kryeministër. Braçe ka pasur një natyrë kritike ndaj qeverisjes, sepse atë natyrë ka pasur gjithmonë”, tha Gjiknuri, duke shtuar se “Braçe do të mbetet gjithmonë një socialist dhe mbështetës për Qeverinë pavarësisht kritikave”.
Lidhur me grupimet brenda Partisë Socialiste dhe përplasjet e mundshme mes tij, me Belinda Ballukun dhe Arben Ahmetajn, Gjiknuri i konsideroi këto si ato teoritë konspirative.
Ai tha se “nuk është pjesë e asnjë grupimi, pasi ato nuk ekzistojnë në PS”, por shtoi se “mund të ketë aleanca, por edhe ato janë të përkohshme”.
“Nuk ka grupime të mirëfillta në PS, mund të ketë aleaca momentale, por jo grupime”, tha Gjiknuri, duke shtuar se në pozicionin e tij si Sekretar i Përgjithshëm është i distancuar nga të gjitha aleancat momentale që mund të jenë ose të krijohen.
