Në një kohë kur kreu demokrat, Lulzim Basha, shprehu vendosmërinë për të mos mbledhur asnjë Kuvend Kombëtar të PD-së, siç u shpreh ai, për të shyqrtuar vendimet e Qeverisë amerikane, ish-Kryeministri Sali Berisha reagoi i bindur se Kuvendi do të mblidhet dhe demokratët do të shprehen me votën e tyre.
Berisha të shtunën ka programuar takimin e rradhës me anëtarësinë e PD në Vlorë, ku do të mbahet edhe “Foltorja” e 3-të rradhazi me demokratët brenda 10 ditësh. Pas Tiranës dhe Fierit, ish-Kryeministri do të ndalet në Vlorë, ku pritet të ripërsërisë qëndrimin e tij ndaj Lulzim Bashës, për të cilin thotë se është marrë peng nga Edi Rama.
Në takimin e Vlorës pritet të jetë i pranishëm edhe drejtuesi politik i qarkut Bujar Leskaj, i cili në mbledhjen e Grupit Parlamentar, ku Basha i njohu deputetët me vendimin e tij, e ka ironizuar kreun e PD, por edhe kreu i degës së kësaj partie.
Ish-Kryeministri shprehet forumet e PD-së do të mblidhen dhe Kuvendi i Partisë do të vendosë se çdo të bëhet me fatin e kryetarit.
Turi i takimeve të ish-Kryeministrit Sali Berisha do të vijojë në të gjitha qendrat e qarqeve me anëtarët dhe simpatizantët e PD dhe do të përmbyllet me dorëzimin e firmave të anëtarëve me të drejtë vote, që do të kërkojnë thirrjen e Kuvendit të Jashtëzakonshëm Kombëtar të PD.
Fillimisht Berisha u shpreh për mbajtjen e një referendumi brenda PD, por duket se referendumi nuk ka lidhje me vendimin për përjashtimin e tij nga Grupi Parlamentar nga Lulzim Basha, por me votëbesimin e këtij të fundit, i cili sipas ish-Kryeministrit ka shkelur statutin e partisë, nuk ka pyetur forumet dhe ka marrë vendimin duke i futur thikë pas shpine demokratëve dhe PD.
