Kredi dhe shtesa fondesh/ Rindërtimi dhe Universitetet, Qeveria akordon 58.5 mln euro

Qeveria ka dhënë 30 milion dollarë shtesë për rindërtimin. Vendimi u bë i ditur nga zv.kryeministri Arben Ahmetaj, pas mbledhjes së Këshillit të Ministrave, ku ka munguar Kryeministri Edi Rama, i cili ndodhet në SHBA.

“Rindërtimi vazhdon me intensitet. Sot i kaluam Fondit Shqiptar të Zhvillimit edhe 30 milion dollarë për të vazhduar punët në terren që të plotësojmë atë angazhim që kemi marrë para qytetarëve,” u shpreh Ahmetaj.

Ahmetaj bëri me dije se po ashtu se janë nënshkruar tre marrëveshje me qeverinë gjermane për 20 milion euro hua për rikonstruksion universitetesh.

“Gjithashtu u nënshkruan tre marrëveshje me qeverinë gjermane për 20 milion euro hua dhe 8.5 milion euro grante për efiçencën e energjisë së godinave të universiteteve publike,” deklaroi ai.

Sipas të dhënave zyrtare nga Ministria e Financave gjatë 8- mujorit 2021 fondet e çelura për rindërtimin ishin 15,7 miliardë lekë ose sa 53 për qind e planit vjetor prej 28 miliardë lekësh shumë poshtë planit të periudhës prej18 miliardë lekësh.

LEXO EDHE  VIDEO/ Me makina dhe flamuj, ja si e presin Berishën në Kavajë

Alokimet mujore të 2021 tregojnë se, nga fondet e shpenzuara në 8 mujor për riparimin e pasojave të tërmetit, 26% ( 3.9 miliardë lekë) u përdoren në muajin prill në prag të zgjedhjeve të përgjithshme parlamentare.

Edhe vitin e kaluar qeveria planifikoi të investonte në programin e rindërtimit 28 miliardë lekë, por në realitet u shpenzuan pak më shumë se 16 miliardë ose rreth 60 për qind e planit vjetor.

Ndryshe nga zërat e tjera të shpenzimeve, fondet e rindërtimit do të mbartën vit pas viti në buxhetet pasardhëse deri sa të realizohen të gjitha investimet e programuara.

Shumica e projekteve të mëdha po ndërtohen me donacione, teksa qeveria e ka rritur borxhin publik pikërisht për financimin e programit. Në fondin total të rindërtimit mungon transparenca se sa fonde janë nga donatorët dhe sa nga burimet e brendshme buxhetore.