Ish-gjyqtari i FIFA, Lorenc Jemini, është i mendimit se VAR-i dhe gjyqtari Laver Alla, kanë gabuar rëndë në sfidën mes Tiranës dhe Egnatias.
Sipas tij, goli i anuluar i Seferit ishte i rregullt, ndërkohë që pretendimi në fundin e ndeshjes nga Ngo, ishte penallti dhe duhej akorduar karton i kuq për mbrojtësin e Egnatias:
“Rasti i 7 minutëshit të famshëm, ndërpritet loja në minutën e 62 dhe fillon në të 69-ën. Goli i anuluar i Tiranës, origjinal si ai që iu la Laçit me Dinamon. Po iu duket si lodër VAR-i. Nuk e kuptojnë sa i vështirë është VAR-i, për mua Xhixha nuk ndikon në aksion. Lojtari i Tiranës është drejt me shtyllën dhe është jashtë zonës së 5 metërshit.
Ndërsa për rastin e pretendimit për penallti, futemi në dyshime, si mos të ndërhyjë VAR-i të paktën? E kuptoni në çfarë sikleti janë futur arbitrat me VAR-in. E kanë mendjen atje te furgoni, thotë shiko se do ma japin ata. Ore zotëri, ai që vendos në fushë edhe me furgonin e VAR-it, është arbitri. Është penallti dhe karton i kuq”, u shpreh Jemini në studion e “Procesit Sportiv”.
