Ministrja e Arsimit, Evis Kushi, u shpreh sot se do të aplikohet mësimi me turne në klasat apo shkollat ku është e pamundur të ruhet distanca mes nxënësve, në kushtet e zbatimit të rregullave anti-Covid.
Gjatë një takimi me drejtuesit Zyrave Vendore të Arsimit Parauniversitar, Kushi ka vënë theksin në respektimin e protokolleve sipas ‘Udhëzuesit mbi masat ndaj COVID-19 në strukturat arsimore parauniversitare’, të miratuar nga Ministria e Shëndetësisë dhe Mbrojtjes Sociale”.
Viti i ri shkollor nis më 27 shtator, ndërkohë që në 3 javët e fundit vendi po përballet me raste të shumta të Covid-19. Mesatarisht Ministria e Shëndetësisë njofton rreth 900 raste çdo ditë, ndërsa numri i personave që humbin jetën raportohet me një mesatare prej 5 çdo ditë.
Pak javë më parë u hodh ideja që mësimi mund të zhvillohej edhe në ambientet e hapura të shkollave, edhe pse duket një ide e parealizueshme për shkak se vjeshta dhe dimri shoqërohen me reshje shiu dhe ulje temperaturash.
Disa nga masat e marra përfshijnë respektimin me rigorizitet të orarit të hyrjes dhe daljes nga shkolla, si dhe rreshtimin në një largësi 1.5 metra nga njëri-tjetri.
Komiteti Teknik ka vendosur se kur një nxënës ka simptoma Covid ai duhet të lajmërojë mësuesin kujdestar, i cili në bashkëpunim me mjekun e shkollës apo familjes vërteton nëse është i sëmurë.
Të gjithë nxënësit duhet të jenë të pajisur me maskë mbrojtëse. Gjithashtu shkollat, sipas mundësive, duhet të ofrojnë dezinfektim për këpucët e fëmijëve para se të futen në institucionet e arsimit.
Nuk lejohet që nxënësit të dalin apo të futen përsëri në godinë. Do të ketë vetëm një herë hyrje në shkollë dhe më pas një herë dalje.
