Vaksinimi i studentëve, rektori i UT: Nuk kishte pse të bëhej i detyrueshëm

Rektori i Universitetit të Tiranës, Artan Hoxha rekomandoi vaksinimin, por shtoi se nuk kishte pse të bëhej i detyrueshëm.

Gjatë ceremonisë në përkujtim të ndarjes nga jeta në vitin 2020 nga COVID-19, të profesoreshës të Fakultetit të Ekonomisë Vjollca Karpici dhe Irena Bogdani, si dhe studentes Euxhena Jorgji, ai tha se gati 75% e pedagogëve janë vaksinuar. Artan Hoxha shtoi se ende nuk është vendosur si do të zhvillohet mësimi, në auditore apo online.

“Vaksinimi s’ka pse të jetë i detyrueshëm. Sa i përket zhvillimit të mësimit, ende nuk kemi vendosur si do të vijojë. Pedagogët dhe stafi i Universitetit të Tiranës janë vaksinuar në masën 75 %”, u shpreh rektori Hoxha.

LEXO EDHE  Komisionet online, Bardhi: Vendimi i papranueshëm, do mbledhim grupet parlamentare

Një javë më parë, kryeministri Edi Rama u shpreh se, “në auditore do të hyjnë ata që vaksinohen”.

“Në mjedise ku janë të tjerët je i detyruar të vaksinohesh. E njëjta gjë vlen për mësuesit, e njëjta gjë vlen për administratën. Aty ku janë mjedise publike që mblidhen shumë njerëz, ke detyrimin të vaksinohesh për të tjerët”, tha Rama një javë më parë, nga Qendra Shëndetësore Nr.1 në Tiranë.

Nga autoritetet, afati për vaksinimin e këtyre grupeve, është lënë fundi i Shtatorit.