Çfarë po ndodh me pandeminë dhe si pritet vjeshta? Ja ç´thotë epidemiologu Alimehmeti

Epidemiologu i njohur, Ilir Alimehmeti, shprehet se vala “Delta” mund të nisë rënien, pasi prej dy javëshka një stabilitet në shifrat e deklaruara lidhur me infektimet.

Por sipas Alimehmetit, edhe kjo nuk mund të thuhet me siguri, pasi testimet që bëhen lidhur me vënien nën kontroll të pandemisë, nuk janë në numrat e nevojshëm.

Prej dy javësh Shqipëria regjistron pothuajse çdo ditë 3 ose 4 humbje jete, dhe pothuajse 1 mijë raste të reja infektimesh, ndërkohë që testimet e realizuara nuk kanë kaluar asnjëherë shifrën 6500 në ditë.

“Ka një frenim të variantit “Delta”, prej dy javësh jemi në një kurbë pothuajse të njëjtë, ndaj dhe ndoshta mund të kemi një rënie të kurbës, edhe pse, nuk bëjmë aq teste sa do na nevojiteshin”, shprehet Alimehmeti për një nga mediat televizive.

LEXO EDHE  Gjendet pistoleta në servis, shpallet në kërkim pronari

Lidhur me imunitetin natyror, Alimehmeti mendon se mundet që rreth 70 % e popullatës të jenë me këtë imunitet, qoftë sepse mund të kenë kaluar virusin, apo edhe nga vaksinat.

Sipas tij, varianti Delta gjeti një terren te personat që nuk kishin kaluar virusin, apo nuk ishin të imunizuar me vaksinat anti-Covid.

Por çfarë mund të ndodhë në vjeshtë?

Alimehmeti thotë se gjithçka do të varet nga mutacionet që do të pësojë virusi.

“Asgjë nuk mund të thuhet me siguri, pasi gjithçka do të varet nga mutacionet ose variantet e reja që mund të qarkullojnë”, shprehet ai.