Deputeti demokrat Agron Gjekmarkaj e ka cilësuar si të vështirë vendimin e kreut demokrat, Lulzim Basha, për të përjashtuar Sali Berishën nga Grupi Parlamentar.
Gjekmarkaj tha se SHBA nuk pranonin negociata me PD, ndërsa shtoi se kërkesa për përjashtimin e Berishës ishte një ultimatum amerikan që erdhi në selinë e PD dhe në zyrën e Lulzim Bashës.
“Basha e mori këtë vendim vetëm për të shmangur debatet në grup apo kryesi. Nuk kishte asnjë zgjidhje. Edhe nëse Basha do të dorëhiqej sërisht problemi do të ishte aty, do tëkishte sanksione, mund të përfshihej PD në listën e organizatave të padëshirueshme”, tha Gjekmarkaj në studion e News 24.
Sipas tij, vendimi i DASH për të shpallur “non grata” Sali Berishën ishte i padrejtë, por ky mbetet një vendim i tyre.
“Mbledhja e Grupit Parlamentar ishte një mbledhje e pazakontë. Mund të them se masakra e 25 prillit u lejua nga ndërkombëtarët, atëherë ne duhet të analizojmë pse ndodhet PD në këtë raport me ndërkombëtarët”, tha Gjekmarkaj.
Sipas tij, nëse do të marrim në konsideratë edhe deklaratat e z. Berisha për dorëheqjen e Bashës, sërisht nuk do të kishte zgjidhje të çështjes, ajo do të mbetej aty dhe çdo kryetar që do të vinte, do të përballej me ultimatumin e tij.
“Nëse Berisha do të tërhiqej në 2013, 2017 apo 2021 nuk do të ishim në këtë situatë, ky ishte një vendim i Berishës, por s´kemi pse të kritikojmë Lulzim Bashën”, tha Gjekmarkaj.
