Presidenti Ilir Meta ka dekretuar Edi Ramën, kryeministër të vendit.
Me një dekret që hyn në fuqi menjëherë, Meta dekretoi Ramën-Kryeministër, sipas propozimit të Partisë Socialiste, e cila ka shumicën e vendeve në Kuvend.
Dekreti vjen pas zhvillimit të zgjedhjeve të përgjithshme për Kuvendin e Shqipërisë të datës 25 prill, rezultati përfundimtar i të cilave është shpallur nga Komisioni Qendror i Zgjedhjeve. Po ashtu dekreti vjen pas fillimit të Legjislaturës X, me thirrjen dhe zhvillimin e mbledhjes së parë të Kuvendit të porsazgjedhur ditën e djeshme.
“Në mbështetje të neneve 93 dhe 96, pika 1, të Kushtetutës, pas zhvillimit të zgjedhjeve të përgjithshme për Kuvendin e Republikës së Shqipërisë të datës 25.04.2021, rezultati përfundimtar i të cilave është shpallur nga Komisioni Qendror i Zgjedhjeve përmes Vendimit nr. 21, datë 13.07.2021, të Komisionit Rregullator, sot më datë 10.09.2021, në fillim të Legjislaturës së X-të, pas thirrjes dhe zhvillimit të mbledhjes së parë të Kuvendit të porsazgjedhur, sipas propozimit me nr. 216 prot., datë 2.9.2021, të Partisë Socialiste të Shqipërisë, parti kjo që rezulton se ka shumicën e vendeve në Kuvend,
Dekretoj:
Neni 1
Zoti Edi Rama, emërohet Kryeministër i Republikës së Shqipërisë”, shkruhet në dekretin e Metës.
