Dy dekada më parë Evropa pa nga larg sulmet drithëruese të 11 shtatorit. Por kontinenti i vjetër nuk e dinte që shumë shpejt do të kthehej edhe ai në viktimë të sulmeve ekstremiste.
Sot, 20 vjet më vonë, evropianët janë ‘mësuar’ me to. Sulme të shumta janë shmangur, por shumë të tjerë kanë shkuar deri në fund.
Eksperti i sigurisë dhe inteligjencës, Claude Moniquet thotë se fatkeqësisht nuk ekziston një jelek antiplumb për t’u mbrojtur nga terrorizmi.
“Kemi bërë progres që prej 2001-shit, që fatkeqësisht u pasua nga sulmet në Madrid dhe Londër. Ne kemi përshtatur ligjet, kemi ofruar më shumë mbështetje. Por mendoj se ajo që duhet bërë është ajo çka Franca dhe vende të tjera po bëjnë sot në rajonin e Sahelit. Përse janë në Sahel? Shumë e thjeshtë, për ta mbajtur terrorizmin sa më larg nga kufijtë evropianë. Mund të duket një politikë e rrezikshme dhe ligjërisht e diskutueshme, por është një çështje sigurie për Evropën”, thotë Moniquet.
Tërheqja e trupave perëndimore nga Afganistani, 20 vjet nga nisja e pushtimit të tij, ka krijuar mundësi për sulme terroriste të reja. Marrja e pushtetit nga talebanët mund t’i kthejë interesat evropiane në shënjestër. Por ka edhe rreziqe të tjera.
“Kemi dy rreziqe serioze. Së pari është ardhja e terroristëve në Evropë të kamufluar nën petkun e refugjatëve, sikurse patëm në vitet 2013-2014 nga Siria dhe që kryen sulme në Paris dhe Bruksel. Por mbi të gjitha, kjo është një fitore për xhihadin global. Marrja e Kabulit nga talebanët u konsiderua një fitore. Këtë mund ta shohim qartë në rrjetet sociale dhe kjo mund t’i japë një shtysë të re xhihadit”, tregon eksperti.
Liderët evropianë tani do të kujdesen që Afganistani të mos kthehet sërish një terren i favorshëm për eksportin e ekstremizmit. /Euronews/
