Nga Boldnews.al
Në fillim ulën kokën, u dhimbsej vendi që lanë, apo iu shuan ëndrrat për të pasur një pozicion të mirë, një post në ministri. Me një shuk në grykë nga pezmatimi dhe me depozitën e lotëve gati në shpërthim, pesë “senatorë” të PS-së shkuan të gjithë njëri pas tjetrit për tu kastruar politikisht nga Rama. Taulant Ballës që pati pritshmëri për të kapur ministri iu hoq edhe pozicioni i Sekretarit të Përgjithshëm të PS-së, duke ia besuar besnikut të Ramës Damian Gjiknurit, që me “tërmetin politik” në Dibër në shitblerjen e votave, apo edhe me skandalin e Unazës së Re duhet të ishte diku në ndonjë dhomëz që ruhet nga gardianë.
Të gjithëve këtyre “kokave” u mungon boshti, duke i vënë drynin gojës para Ramës dhe qëndrojnë me shpresën se një ditë do të përfshihen sërish, duke pranuar që të përbuzen, fyhen dhe denigrohen nga lideri i tyre Edi Rama. Në mbledhjen e Asamblesë Kombëtare të PS-së ku u caktua edhe qeveria e re ra në sy prania e Pandeli Majkos. I mërzituar doli nga salla bashkë me Erion Braçen, që edhe ai turfullonte nën maskën e madhe që gati i kishte mbuluar gjithë fytyrën.
Majko iku si i nevrikosur, ashtu tekanjos ishte edhe në qeveri, por gjithnjë i bienin puplat sa herë Rama i lëshonte ndonjë shikim shpues. Parimori Majko ishte kundër shembjes së Tetarit Kombëtar, por kur godina u shkërmoq ai nuk foli, duke u justifikuar se kishte probleme me dhëmballët dhe se nuk duhet të fliste…
Po Braçe është përfundimisht i “pandreqshëm”! këtij Rama nuk ka si tia bëjë. Braçe të bën gjëmën, por në facebook, duke u ankuar për administratën. I bie fort, po shumë fort samarit që ta dëgjojë gomari. Se ai i majmuri “gomari gri” tërheq pas gjithë pushtetin dhe ai vendos për gjithçka.
As Fatmir Xhafaj nuk u ndje kur numëronte plot ankth votat por nuk e qasën në kryesi. Padyshim që si një “hulumtues” (hetues) i sistemit komunist, di të analizojë thellë arsyen se përse udhëheqësi nuk po e afron. Por Xhafaj rri aty, pret momentin dhe ndonjë deriçkë hapur për tu futur sërish në korridoret e errëta të sistemit që ka ngritur vetë bashkë me liderin e tyre që e urrejnë ndonjëherë por e duan çdo herë.
Rasti më brilant është ai i Taulant Ballës. Burrë me gati 20 mijë vota personale në xhep, triumfator i madh u shfaq në parti, ndërsa mburrej kudo se në qarkun e Elbasanit ishte ai Zot dhe Rama ishte i detyruar ta shpërblente më një post ministrie të rëndësishme. Dhe Rama e “shpërbleu” me largimin edhe nga Sekretari i Përgjithshëm i PS-së dhe nga qarku i Elbasanit, për ta “internuar” pranë Azotikut në Fier. Ai sërish nuk bzani, foli gjatë por nuk tha qoftë edhe një fjalë kundër liderit Rama. Ama u hakmor “rëndë”, ku për turpin tonë edhe si shoqëri teksa luhej takimi Shqipëri-Hungari në Elbasan një dron fluturoi mbi stadium me mbishkrimin: “Taulant Balla Elbasani të do”.
Nëse do të duan që të bëjnë sërish hajër në Rilindjen e tyre, nevojitet të ndjekin shembullin e Ditmir Bushatit. Ky “kryediplomat” që para zgjedhjeve aty këtu doli hapur kundër politikave të Ramës, u rikthye si i penduar tek “gjyshi i madh”.
Rama e caktoi si një “kryeakademik” i shkollës së partisë, e ngjashme me “Shkollën e Partisë Vladimir Iliç Lenin”. Gjithashtu do të jetë edhe anëtar i kryesisë së PS-së, duke falenderuar Ramën, Bushati do të bëjë “stazhin e partisë” për të kaluar më pas në një “filtër të imët” ku shokët e pushtetit do të japin relacione mbi sjelljen e tij, a është penduar për rrugën e shtrembër që ndoqi para zgjedhjeve dhe më pas do të vendosë për të Edi Rama. Të gjithë të “kastruar politikisht” duke lënë edhe atë pak shenjë mashkullore në duart e Ramës, i cili në parti pë bën “sterilizimin”.