Fasadë opozitë e ka cilësuar ish-Kryeministri Sali Berisha atë që Lulzim Basha bëri me vendimin për përjashtimin e tij nga Grupi Parlamentar.
Berisha tha se vendimi i Bashës është marrë për interesa të tij, duke shtuar se ai do të bëjë gjithçka për t´a kthyer PD te partia e vlerave dhe parimeve.
“Do krijoj aleanca me çdo demokrat, me çdo qytetar që PD të kthehet te vlerat e saj, që vendi mos ketë një opozitë fasadë.
Unë si kam dhënë mbështetje Bashës, as e kam zgjedhur unë kryetar”, tha Berisha në emisionin “Opinion”.
Berisha tha se në vend që Lulzim Basha të bindte ndërkombëtarët për t´i vendosur Edi Ramës sanksione, ai nuk bëri këtë, por e futi PD në procesin e brendshëm zgjedhor.
Pjesë nga biseda në Opinion:
A do të shkoni në parlament ?
Berisha: -Padiskutim.
Si do të ndihesh vetëm?
Berisha: -Do të mbroj pluralizmin e vërtetë. Me vendimin që mori Basha i dha shkelmim pluralizmit të Shqipërisë. E ktheu në pluralizëm fasadë.
A je ndier i zhgënjyer që e mbështete Lulzim Bashën?
Berisha -Absolutisht nuk e zgjodha. E zgjodhën anëtarët e PD-së në një garë të hapur. Por për vendimin e tij të sotëm ai i ka dhënë goditjen më të rëndë për interesa të veta vendit, PD-së dhe pluralizmit të Shqipërisë. Do bëj gjithccka për rivendosjen e sovranitetit të PD-së, rikthimin e saj në ato parime që i shkelmoi sot në mënyrë të paimagjinueshme Lulzim Basha dhe pa të cilat forca politike është fasadë opozitë.
