Fitorja e Anglisë kundër Andorrës 4-0 e ruan perfekt rrugëtimin e “Tre Luanëve” drejt Botërorit të Katarit. Në pritje të ndeshjes me Poloninë sot në Varshavë, Garet Sauthgejt shijon diferencën +5 nga skuadra e Robert Levandovskit kur janë luajtur 50% e ndeshjeve të Grupit I dhe +6 nga Shqipëria.
Por kur mund ta presin ishullorët biletën në Botëror? Me një fitore ditën e sotme, Anglia do ta thellonte avantazhin në 8 pikë me polakët dhe duke e marrë të mirëqenë fitoren e kuqezinjve në shtëpi me San Marinon, diferenca me vendin e dytë mund të shkojë në +6.
Me katër ndeshje deri në fund të kualifikueseve, Anglia mund ta sigurojë biletën e saj në Katar me fitoren në transfertë me Andorrën dhe në shtëpi me Hungarinë muajin e ardhshëm, nëse Polonia i merr pikë Shqipërisë.
Vetëm skuadra e parë e grupit shkon direkt në Botëror, ndërsa ekipet e dyta do t’i nënshtrohen “play off”-it. 10 skuadrave të dyta të fazës së grupeve do t’u bashkohen edhe dy fitueset e grupeve të sezonit të shkuar të Ligës së Kombeve në një miniturne që do të zhvillohet në mars ku do të kualifikohen edhe tri skuadra të tjera.
Përveç Shqipëri-San Marino dhe Poloni-Angli, Grupi I luan sot edhe ndeshjen Hungari-Andorrë, ku skuadra e Marko Rosit do të tentojë të reagojë pas humbjes me kuqezinjtë në Elbasan.
