Ish-Kryeministri Sali Berisha deklaroi mbrëmjen e së hënës në Euronews Albania se do vijojë betejën politike në parlament, pavarësisht thirrjeve të ambasadores së SHBA, e cila ka kërkuar që ai të mos jetë pjesë e tij.
Politologu dhe ish-zëdhënësi i Berishës, Ermal Hasimja thotë se qasja që ka zgjedhur z. Berisha e dëmton PD-në në raport me marrëdhëniet me Shtetet e Bashkuara të Amerikës.
“Qëndrimi i tij e dëmton marrëdhënien e PD me aleatët tanë të rëndësishëm, amerikanët. Nëse do të pranonte të hiqte dorë nga politika, do të pranonte praktikisht atë akuzë apo atë damkë që i është vënë”, tha ai.
Përballë moderatores Erla Mëhilli, Berisha tha se nuk pret që të përjashtohet nga grupi parlamentar i PD-së, por nëse ky skenar realizohet, ai paralajmëroi se do ta kthente PD-në siç ka qenë.
Sipas Hasimes, skenari për të larguar Berishën nga grupi parlamentar mund të prodhojë “stuhi të forta” në Partinë Demokratike.
“Patjetër. Kjo është pjesë e lojës. Është kollaj ta heqësh. Edhe Basha edhe PD…dhe të tjerët që donin ta largonin, natyrisht që i bëjnë llogaritë me një stuhi të brendshme që mund të shkaktojë z. Berisha, por dhe përmes mbështetësve të tij brenda vetë PD”, tha ai.
Gjithsesi, Hasimja mendon se skenari më i mirë në këto rrethana do ishte që ish-lideri historik të largohej vetë nga Partia Demokratike, por edhe kjo zgjedhjE shton ai e ka një kosto në kurriz të Berishës.
“Mendoj se në të gjitha rastet PD do të goditet. Dilemat e z. Basha kanë lidhje me atë që kërkon më pak goditje. I vetmi skenar që mund të funksionet mirë është që vetë z. Berisha të vendoste të largohet vetë për të mirën e PD, por nëse e bën këtë do duhet ta marrë mbi supet e veta damkën që i është vënë”, tha ai.
