Ish-Kryeministri Sali Berisha u shpreh mbrëmjen e sotme se Sekretari amerikan i Shtetit, Anthony Blinken, është keqinformuar nga Qeveria shqiptare, Soros dhe NGO, si ajo e Delina Ficos, në marrjen e vendimit për të më shpallur “non grata” mua dhe familjarët e mi.
Berisha tha se ai iu drejtua Gjykatës jo për të ndryshuar vendimin e DASH, por për shpifje.
“Në Parlament do të mbroj dinjitetin tim. Edi Rama do ketë në Parlament një prej opozitarizmit më të ashpër, madje do t´i duket lule ajo që ka pasur më parë”, tha Berisha, duke e akuzuar Ramën direkt si personin që ka tentuar të eleminojë kundërshtarin politik përmes shpifjeve dhe trillimeve.
Berisha tha se Rama vjen në Kuvend si një mënxyrë, si njeriu i cili në 8 vite ka grabitur miliarda e miliarda dhe ka përfunduar gjithsej 37 km rrugë.
“Edi Rama vjen në Parlament si anti-shqiptari më i madh, vjen si një vasal i pështirosur i Aleksandar Vuçiç. Rama është një nga bashkëautorët e asaj që ndodhi në Mali e Zi”, tha Berisha.
Ish-Kryeministri deklaroi se nuk qëndron aspak pas vendimeve për djegien e mandateve nga PD në 2019 dhe bojkotin e zgjedhjeve vendore në 2020.
“Unë jam anti-konformist, atë që kam e them, kur më ka pyetur Lulzim Basha, i kam dhënë një këshillv, kur s´më ka pyetur nuk i kam dhënë këshilla”, tha Berisha.
I pyetur nëse do të linte në hije Lulzim Bashën me opozitarizmin në Kuvend, Berisha tha qëndrimi i tij nuk ka të bëjë me errësimin e Bashës apo cilitdo deputeti, por mbrojtjen e interesit kombëtar.
“Po pres me padurim ti përvishem Edi Ramës ashtu siç e meriton”, u shpreh Berisha.
