Historia e zyrtarëve të korruptuar në Shqipëri, të lidhur me grupet kriminale, tashmë është e njohur prej kohësh edhe jashtë kufijve. Pas raportimeve të rastit të bujshëm të përgjimeve të dosjes 339, të publikuara nga “BILD”, raportimet e mediave italiane mbi biznesin e Ndaghrehta-s me bashkinë e drejtuar nga Erion Veliaj, temës i është rikthyer media me bazë në New York, “Vice.com”.
Gazetari Max Daly, teksa raporton për aksionin e autoriteteve spanjolle që në bashkëpunim me partnerët goditën një rrjet kriminal shqiptar të trafikut drogës, shkruan për lidhje të krimit me politikën në Shqipëri.
“Duket se bandat shqiptare, të ndihmuara nga zyrtarë të korruptuar nga vendi i tyre, janë futur me sukses në industrinë e paligjshme të drograve në Spanjë, duke zhvendosur kultivimin e drograve nga Shqipëria në Spanjë për të mundësuar qasje më të lehtë në tregjet fitimprurëse si Mbretëria e Bashkuar, Gjermania dhe Franca. Përveç faktit që janë lojtarë kryesorë në industrinë e kokainës në Evropë, bandat shqiptare janë përfshirë shumë në skenën e kultivimit ilegal të kanabisit në Mbretërinë e Bashkuar”, thuhet në artikull.
“Tregtia e drogës ka shkaktuar një rritje të arrestimeve të kriminelëve shqiptarë në Spanjë dhe dhunës së lidhur me bandat. Në dhjetor, një shqiptar i dyshuar si i përfshirë në trafikun e drogës u qëllua për vdekje në një restorant në bregdetin juglindor të Spanjës”, shkruhet po ashtu në artikull.
DENONCO