Shqipëria merr një mësim të mirë në ndeshjen e katërt eliminatore të Botërorit 2022. Kuqezinjtë tanë ndëshkohen 4-1 nga Polonia që më shumë se për meritë të tyre, ndëshkojmë veten nga gabime shumë të rënda në mbrojtje.
Ndeshja nisi disi me frikë për kuqezinjtë tanë e për më tepër e ashpër ku vetëm në 10 minuta u ndëshkuan tre lojtarë si Abrashi, Bare dhe Hysaj. Në rastin e parë të rrezikshëm, Polonia gjen golin me të përhershmin Lewandowski që zë mbrojtjen kuqezi në befasi, shkruan Ora News.
Gjithsesi, lojtarët tanë reagojnë shumë mirë pas golit të pësuar dhe marrin lojën nën kontroll teksa në minutën e 25’, Cikalleshi me të majtën pas një asisti nga Gjasula, arrin në zone të godasë dhe të barazojë shifrat.
Shqipëria kalon moment të mirë dhe nuk mungojnë rastet me Manaj dhe sërish me Cikalleshin por që nuk konkretizohen dhe në 44’ sërish në një goditje dënimi, dënohemi nga pakujdesia. Pas një krosimi nga e djathta, Buksa me kokë gjen rrjetën pasi topi kishte prekur dhe shtyllën.
Pjesa e dytë nis e ekuilibruar dhe me të dyja skuadrat që luftojnë por sërish pësojmë një gol amator shumë të thjeshtë teksa gabojmë që në mesfushë duke i dhënë topin Lewandowskit i cili shkon deri në zone teksa kalon Berishën dhe ofron topin për Krychowiak që shënon 3-1.
Pas golit edhe Gjasula me Manajn marrin të verdhë duke e bërë dramatike situatën pasi që të dy bashkë Hysajn dhe Baren nuk do të luajnë ndaj Hungarisë.
Goli i pësuar ndikon psikologjikisht edhe te lojtarët që në minutat e mbetura përpiqen të bëjnë diçka por nuk arrijnë të shkojnë deri në portën e polakëve. Këta të fundit ndërkohë paten kohën të shënonin edhe një të katërt me Linety. Me këtë fitore Polonia ngjitet në vend të dytë me 7 pikë po aq sa Hungaria dhe Shqipëria teksa hungarezët u mundën 0-3 në shtëpinë e tyre nga Anglia.
https://streamable.com/e5ptsh
https://streamable.com/wzdjfw
https://streamable.com/wy67yi
