Policia e Spanjës ka goditur një grup kriminal të trafikut të drogës, duke arrestuar mbi 100 persona, mes tyre edhe shqiptarë.
Këtë të Mërkurë, janë dhënë detaje rreth operacionit nga policia spanjolle dhe partnerët. Drejtori i Përgjithshëm i Policisë së Shtetit Ardi Veliu, është shfaqur në konferencën për shtyp në Madrid, për prezantimin e rezultateve të megaoperacionit të përbashkët të koduar “DOBRA”.
Në një njoftim zyrtar, policia shqiptare bëri me dije se në kuadër të këtij operacioni u godit një grup kriminal në fushën e krimit të organizuar dhe u arrestuan 107 persona të dyshuar të përfshirë në krimin e organizuar në fushën e drogës.
Të njëjtat burime shtuan se, gjatë këtij mega-operacionit u kryen kontrolle në 51 ambiente, nga të cilat 23 plantacione/shtëpi bari, u asgjësuan rreth 25.000 bimë narkotike kanabis, u sekuestruan 938 kg boçe kanabisi, një detonator, dy armë zjarri, tri mjete luksoze, një bllokues valësh, 68.760 euro etj.
Një zyrtar i policisë spanjolle tha gjatë konferencës se u godit një rrjet mafioz shqiptar pas hetimeve 1-vjeçare në bashkëpunim me autoritetet ligjzbatuese jashtë Spanjës. Ai tha se droga, nga Spanja, trafikohej dhe në Gjermani e më pas në vende të tjera të Europës.
Kreu i Policisë shqiptare, Ardi Veliu paralajmëroi hetim pasuror në Shqipëri. “S’do mjaftohemi vetëm me ndalimin e operacionit në këtë stad, por do vazhdojmë të investigojmë në vendin tonë duke investiguar të gjitha pronat që mund të kenë ardhur si rezultat i këtij aktiviteti kriminal për të gjithë shtetasit e përfshirë. Sepse duke e goditur dhe në pjesën ekonomike, i japim një goditje shumë të fortë këtij grupi kriminal duke e paralizuar”, tha Ardi Veliu gjatë konferencës.
Lidhur me rolin e policisë shqiptare, Ardi Veliu saktësoi se ndihmoi me informacion kolegët spanjollë për gjithë shqiptarët e përfshirë në këtë operacion.
Lexo edhe:
Operacion i madh anti-drogë me 107 të arrestuar, zbardhen detajet
Detaje/ Grupi shqiptar i drogës, si nisën hetimet nga autoritetet spanjolle (VIDEO)
