Policia e Vlorës ka identifikuar dhe ka shpallur në kërkim autorin e dyshuar për atentatin ndaj Edison Begajt, ngjarje e ndodhur në 29 maj të këtij viti në Kaninë.
“Blutë” bëjnë me dije se në kërkim është shpallur 36-vjeçari Mikel Prifti, ndaj të cilit ishte vendosur masa e sigurisë “arrest me burg” nga Gjykata e Shkallës së Parë Vlorë.
Prifti akuzohet për veprat penale “Vrasja me paramendim”, mbetur në tentativë dhe “Armëmbajtja pa leje”.
Ky shtetas dyshohet se për motive të dobëta, ka tentuar të vrasë me armë zjarri, shtetasin Edison Begaj 41 vjeç, i cili si pasojë e të shtënave ka mbetur i plagosur, njoftoi policia.
Sipas burimeve, disa ditë para ngjarjes të dy personat janë konfliktuar në një lokal në zonën e Lungomares ku Edison Begaj e ka goditur 36- vjeçarin me shpullë në publik. Ky i fundit se ka falur këtë gjë dhe më pas ka tentuar ta vrasë.
Begaj u qëllua me katër plumba në këmbë në hyrje të banesës së tij. Autori ka qenë i veshur me rroba si të policisë dhe i maskuar në momentin që qëlloi me armë në drejtim të Begajt.
Lexo edhe:
Atentati ndaj Edison Begajt/ Çanta me para i shpëtoi jetën (Video)
