Një sasi prej rreth 260 kg kanabis është sekuestruar në Kaninë të Vlorës. Autorët e dyshuar të kultivimit të lëndës narkotike nuk janë arritur të vihen në pranga, por policia njoftoi se janë identifikuar dhe shpallur në kërkim. Ata janë Fatbardh Kapllanaj, Engjëllush Kapllanaj dhe Klajdi Kapllanaj – babai dhe dy djemtë.
Ndërkaq, blutë kanë vënë në pranga kryeplakun e fshatit Kaninë dhe një elektricist i OSHEE. Ata akuzohen se nuk kanë kryer kontrolle në zonën ku ishte kultivuar droga, siç e përcakton detyra e tyre.
Droga
Aksioni policor i koduar “Çairet” u krye nga seksioni për Hetimin e Trafikut të Paligjshëm dhe Narkotikëve në bashkëpunim me Forcën Operacionale në DVP Vlorë, mbi bazën e informacioneve të siguruara në rrugë operative, njoftoi policia.
Si rezultat i operacionit, u bë shpallja në kërkim e autorëve të dyshuar për kultivim të bimëve narkotike: shtetasve Fatbardh Kapllanaj, 45 vjeç, Engjëllush Kapllanaj, 22 vjeç dhe Klajdi Kapllanaj, 20 vjeç, banues të tre në fshatin Kaninë.
“Shpallja në kërkim e këtyre shtetasve u bë pasi, në vendin e quajtur ‘Çairet’, në fshatin Kaninë, gjatë kontrollit të ushtruar nga shërbimet e Policisë në banesën e shtetasit Fatbardh Kapllanaj, u gjetën dhe u sekuestrua 210 kg lëndë e dyshuar narkotike kanabis. Gjithashtu gjatë kontrollit të ushtruar në një ambient pranë banesës së këtij shtetasi, e përshtatur si serë, me lidhje të jashtëligjshme të energjisë elektrike, Policia gjeti fidanë narkotikë të kultivuar në serë dhe në kubikë, si dhe një sasi prej 52 kg lëndë e dyshuar narkotike kanabis, në proces tharje”, njoftoi policia.
Arrestimi i kryeplakut dhe elektricistit
Në vijim të veprimeve hetimore u arrestuan në flagrancë shtetasit Andon Todi 61 vjeç, me detyrë kryeplak i fshatit Kaninë, për veprën penale ‘Moskallëzimi i krimit’ dhe Gramos Islamaj, 51 vjeç, me detyrë elektricist pranë OSHEE-së, për veprën penale ‘Shpërdorimi i detyrës’. “Të dy këta shtetas, në kundërshtim me ligjin nuk kanë përmbushur detyrën”, sqaroi policia.
Dosja për rastin i ka kaluar prokurorisë së Vlorës. Veprat penale që rëndojnë ndaj të arrestuarve janë për veprat penale “Prodhimi dhe shitja e lëndëve narkotike”, “Kultivim i bimëve narkotike”, “Vjedhje e energjisë elektrike”, “Shpërdorimi i detyrës” dhe “Moskallëzimi i krimit”.
