Nga Boldnews.al
Çfarë milet i keq paskemi qenë. Edhe në këto ditë vere nuk e lamë një moment të qetë liderin Ramë që të pushojë paksa në buzë të detit në vilën qeveritare. Aty ku pret e përcjelle njerëz të njohur, duke nisur nga Aleksandër Soros (djali i Xhorxh Soros), apo ish- i dërguari amerikan për bisedimet Kosovë-Serbi, Richard Grenell. Priti edhe Dua Lipën. Po kenaqej disi, po e merrte veten dalëngadalë pas një beteje të gjatë për zgjedhjet.
Për të nuk ishte aq e lehtë të blinte vota dhe të përdorte administratën për të rrëmbyer mandatin e tretë. U lodh shumë, u sflilit duke punuar jo për vete, por për Shqipërinë. Për rininë që ka ikur jashtë vendit se gjoja këtu nuk ka shpresë, por ai e di më mirë se kushdo tjetër se shqiptarët ikin, e madje mirë e bëjnë që ikin se janë shtresë e mesme që kanë “pretendime” për jetësën dhe të drejtat. Por vendi nuk do mbesë i shkretë, aq kohë sa të kemi liderin Ramë, ky vend do të presë të huaj hallexhi që do punojnë në kullat e oligarkisë dhe gatitjen e betonit që masivisht derdhet në bregdet dhe kryeqytet.
Po ne jemi “popull mosmirënjohës”, nuk e lamë të pushojë paksa. I jemi hedhur keq nëpër fejsbukëra se po sjell afganët në vendin tonë. Sikurse e tha edhe vetë Rama, që koha po e tragon se ka aq aftësi të jashtëzakonshme sa të shihet edhe si “Mullai i madh shpirtëror”, ne jemi “Shqipo mendjefikur”.
Ai i di mirë këto punë. Po përse të mos i presë afganët e shkretë që po ikin nga frika e ndonjë hakmarrje talebane? Po kjo Ramës vetë i krijon benefite politike. Me ca qindra apo mijëra afganë të strehuar në konviktet e Qytetit Studenti në Tiranë, Rama i shqyen si i “shpisë” dyert e ambasadave të rëndësishme. Ata i japin frymë politike, e mbajnë të qeverisë si një vizionar që diku do e shpjerë vendin, në BE sigurisht jo, por në BG (Beograd po).
Vertetë këtu ka shumë varfëri, korrupsion dhe krim të organizuar dhe ai e di mirë, por varfëria është jetë, sepse prej saj vjen shitja e votës dhe shantazhi për humbjen e punës, korrupsioni i mban pushtetin dhe i jep adrenalinë drejtuesve të qeverisë dhe administratës së lartë, ndërsa krimi i organizuar është “motorri i ekonomisë”, edhe pse mban paksa erë hashash, kokainë dhe prostitucion.
Megjithë këto të mira të mëdha që mban ky vend i vogël, disa qytetarë i sulen nëpër rrjetet sociale për politikat e tij. E sërish kryeministri ynë është i duruar, i shikon, u kthen përgjigje, i “ftillon ndonjëherë” dhe qëndron për orë e orë të gjata nëpër rrjetet sociale. Është “gjeni i propagandës” dhe e di mirë se të “qeverisësh shqipot” nuk ka nevojë për vepra, por për fjalë dhe “tallava qyfyresh”, të cilët lideri Ramë i ofron me shumicë, nuk shterron asnjëherë mendja e tij pjellore.
Po ku marrin vesh “shqipot mendjefikur”. Me pranimin e muxhahedinëve dhe afganëve, Rasma do të cilësohet si: ‘Shpirtmadhi i evropës’, ‘shpëtuesi i kauzave të humbura’ dhe themeluesi i “njeriut të ri Rilindas”. Kaq shumë po vuan për të na ndriçuar mendjen e sërish ne nuk kuptojmë, ka që nga viti 1998 që plasi duke bërë kaq shumë për këtë vend sa vetëm ai me politikat e tij mund të realizonte ikjen e 400 mijë shqiptarëve. Një strategji që i eci, e sërish karshi këtyre arritjeve jemi mosmirënjohës. Na e bëj kabull kryeministër, faji ynë që nuk po e kuptojmë vizionin tënd që kapërcen aq lehtë kufijtë e një Shqipërie të vogël, ku së fundmi kaloi nga Maqedonia e Veriut deri në Serbi.