Shqipëria po pret grupin e parë të afganëve, që do të strehohen këtu, pasi talebanët morën pushtetin në Afganistan. Kryeministri Edi Rama u mjaftua me një postim në rrjetet sociale për të shprehur vullnetin e Qeverisë për të mirëpritur refugjatët afganë, vendim ky që u pasua me deklaratat e kreut demokrat Lulzim Basha, i cili tha se Shqipëria ka detyrime ndaj aleatëve të saj.
Në fakt politikisht dy kryetarët e partive kryesore në vend janë shprehur pro strehimit të afganëve në Shqipëri, ndonëse të paktën publikisht nuk dihet asnjë detaj.
Asnjë nuk e di nëse Kryeministri është kosultuar me Presidentin, Parlamentin, Këshillin e Sigurisë, dhe çdo institucion tjetër lidhur me vendimmarrjen. Sikundër askush nuk e di se sa kohë do të mund të qëndrojnë afganët në Shqipëri, se sa vshtë numri i tyre, ku do të strehohen etj.
I gjithë procesi po trajtohet si një operacion sekret, i ngjashëm me atë të “armëve kimike” 8 apo 9 vite më parë, por me dallimin e vetëm se në atë kohë, opozita mbështeti protestat qytetare, ndërsa tani është mjaftuar me një deklarim pro strehimit, pa kërkuar as transparencë as hollësi të tjera, të paktën publikisht.
Të vetmet reagime janë ato të qytetarëve në rrjetet sociale, të cilat herë u përgjigjet Rama me akuza dhe herë me arrogancë. E duket se në këtë luftën e rrjeteve sociale përballë kundërshtarëve, jo të strehimit të afganëve, por të procesit vendimmarrës pa asnjë lloj transparence, Edi Rama po angazhon strukturat partiake, patronazhistët dhe çdo rilindas. Qëllimi është që rrjeti të ziejë nga komentet pozitive, që të mbrohet ardhja e afganëve dhe theksi të vihet në faktin se ata që do të vijnë në Shqipëri janë intelektualë.
Mesazhi i mëposhtëm i siguruar nga Syri.net zbardh udhëzimin që i është dërguar strukturave partiake, që duket se është një urdhër ndaj tyre për t´i hyrë luftës në rrjetet sociale, me ata që nuk mendojnë si Rama, jo për të strehuar afganët, por për të marrë vendimet në emër të shqiptarëve, pa i pyetur ato.
