Deklaratat e Berishës/ Kadilli për Bashën: Prandaj njerëzit nuk të besojnë sepse nuk flet kur duhet, je kryetar por nuk je lider

Ish-Kandidati për Kreun e Partisë Demokratike, Fatbardh Kadilli ka sulmuar ashpër Kryetarin e PD, Lulzim Basha për shka të heshtjes së tij pas urdhrit të Ambasadores Yuri Kim, për përjashtimin e ish-Kryeministrit Berisha nga Parlamenti i ardhshëm.

Sipas Fatbardh Kadillit, Lulzim Basha është thjesht kryetar i PD-së, por nuk është një lider, prandaj dhe vendimin ja lë ta shpallë vetë Berisha. Kjo gjë bën që njerëzit të mos e besojnë Bashën sipas Kadillit.

Berisha deklaroi ditën e sotme se do të jetë pjesë e parlamentit pavarësisht thirrjeve të Yuri Kim, duke shtuar se kërkon të bëhen publike të gjitha faktet kundër tij. Për Kadillin, Sali Berisha është në të drejtën e tij për t’u mbrojtur, por Lulzim Basha duhet të reagojë për këtë ccështje.

Në fund Fatbardh Kadilli thekson se problemet që ka sot PD janë shumë të thella, shto këtu dhe problemet me SHBA-të, prandaj duhet një përballje me të vërtetën në mënyrë që të tejkalohen këto probleme. Gjithsesi, për Kadillin, Basha nuk është njeriu i duhur për drejtimin e Partisë.

Rikujtojmë se pak ditë më parë Yuri Kim u shpreh mjaft qartë se Sali Berisha nuk duhet të jetë pjesë e Parlamentit të ri dhe se PD duhet të ketë kurajo ta përjashtojë. Kjo kërkesë vjen pas vendimit të DASH për të shpallur Berishën non-grata për vepra të korrupsionit madhor.

Gjithsesi, ish-Kryeministri ka paditur Sekretarin Amerikan të Shtetit Antony Blinken për të cilin thotë se nuk ka prova për akuzat e bëra ndaj tij. Ditën e sotme, Berisha konfirmoi edhe njëherë se do të jetë pjesë e parlamentit, sic ka vendosur populli.

Reagimi i Kadillit:

Kemi kryetar, por jo Lider

Nuk mjafton të ulesh në karrigen e kryetarit që të kryesosh, të udheheqësh. Janë gjëra të ndryshme.

Kryetar të bëjnë vendimet. Kryetar të bëjnë idetë politike që shpall. Të bëjnë kauzat. Të bëjnë fitoret dhe humbjet. Të bëjnë kurajo dhe realizmi për të parë pa ngurim të vërtetën. Kryetar të bëjnë betejat, të bëjnë shokët që zgjedh. Të bën aftesia për të ndërtuar partneritet me bashkëpunëtorët, me qytetarët, me aleatët, me faktorët e ndryshëm. Të bën emri që krijon si imazh, si ikonë, si perceptim publik. Të bën karakteri i mirë a i keq qoftë. Dhe lista vazhdon… gjithkush mund të shtojë edhe imtësi të tjera jo shumë të dukshme.

Por për ne të PD renditja e tyre është e kotë. Ne në PD kemi kryetar që ka vetëm letrën e komisionit, ka vulën dhe zyrën dhe gjëndjen mendore që t’i bëjë të paqena gjithë këto tipare që renditim. Nuk do lodhesha t’i renditja, por besoj se vetëm kjo listë shërben si pasqyra ku kryetari në vend të portretit të tij, sheh vetëm avull.

Në krizën më të rëndë në raportin e PD me partnerin strategjik të Shqipërisë, kryetari fshihet! Mungon! Nuk është! Nuk flet! Fshihet si miu prapa poçes.

Situatë perfekte për atë që s’do të bëjë asgje. S’do të bëj as kryetarin! Ja le Berishës ta shpallë qëndrimin. Prandaj njerëzit nuk e besojnë për kryetar. Nuk flet kur flet kryetari. Flet ai tjetri, ose të tjerë në vend të tij. Prandaj nuk krijon dot besim. Prandaj populli nuk e sheh si lider. As vetë partia nuk e konsideron të tillë. Kot shpenzon për kompani fushatash dhe lobimesh. Heshtja e Bashës në këtë moment dramatik kur kemi një konflikt të hapur mes Departamentit të Shtetit dhe Berishës nuk i jep lidership demokratit të thjeshtë.

Berisha është në të drejtën e vet të mbrohet. Do të mbrojë veten, familjen dhe historinë. Por kryetari duhet të flasë në emër të partisë. Të mbrojë partinë. Të mbajë qëndrim parimor në emër të partisë. Vetja, familja dhe historia e kryetarit është partia. Partia pret që ai ti dalë zot. Ai hesht! Nxjerr diku hijen, jo kokën. Na shërben një editorial pa emër nga një portal. Përpiqet të ndërtojë një linjë politike si tel pelivani. Do ta mbajë mirë edhe me amerikanët, edhe me Berishën.

Nuk mbahen dy kunguj në një sqetull. Berisha sot deklaroi që Basha është me atë. Basha vijon të heshtë. Në rast se heshtja e Bashës është aprovim atëhere mund të themi se për herë të parë në 30 vjet, që nga dita e themelimit të saj PD është zyrtarisht në konflikt të hapur me Departamentin e Shtetit. Ky është një problem shumë serioz, më shumë për të tashmen dhe sidomos për të ardhmen e PD-së, se sa të Departamentit të Shtetit.

Nuk dihet nëse Basha tashmë me shpatulla pas murit do e thyejë heshtjen. Ai gjithnjë kërkon ti nxjerrë gështenjat me duart e të tjerëve. Por sot Berisha foli dhe tha se nuk lëviz as nga PD as nga e tija.

A pi më ujë që Basha t’i thotë Berishës se “ja, janë disa që po rrisin presionin nga brenda”?

Në rast se do të jetë përfundimisht i detyruar të ndahet formalisht nga Berisha, kjo nuk mund të bëhet me taktikën e tij të zakonshme që nxit të tjerë të flasin, ose u jep zemër pasi kanë folur. Heshtja e gjatë e Bashës nuk është pjekuri, maturi, kujdes për PD e hutuar, por është frikë dhe pazotësi për të udhëhequr.

Po pse e do atë karrike? Pse do që të jetë kryetar, kur nuk i del zot partisë në situatën më të vështirë? Pse e do karriken kur nuk ka asnjë vullnet për të ngritur një opozitë të re? Kur nuk ka as idenë më të vagullt se si duhet të jetë një opozitë e re?

Basha, përkundrazi fërkon vulën dhe pret që të kalojnë edhe këto probleme. Por problemet që ka sot PD nuk kalojnë dot lehtë. Ne kemi probleme me demokracinë, me rininë dhe gruan shqiptare dhe me Shtetet e Bashkuara të Amerikës. Na duhet një Lider që nuk shpreson t’i varrosë këto probleme por që t’i zgjidhë këto probleme.

Sot për sot kemi një kryetar, por nuk kemi lider!

LEXO EDHE  Shkullaku: Ja ku gaboi Basha me Berishën