Ka shkuar në tre numri i viktimave nga ngjarja e rëndë e ndodhur në Velipojë, pak javë më parë, ku shpërtheu një bombul gazi në hotelin e familjes Gjoka.
Pas dy vajzave ka ndërruar jetë dhe nëna, ndërkohë që në gjendje të rëndë vijon të mbetet djali i familjes.
Alketa Gjoka ka ndërruar jetë pas pothuajse një muaj nga shpërthimi i ndodhur në 4 Korrik, ndërkohë që më herët kishte humbur edhe dy vajzat e saj 15 dhe 19 vjeç.
Në luftë për jetën vijon të qëndrojë djali i mitur i familjes, ndërkohë që tragjedia ka prekur zemrat e të gjithë familjarëve dhe miqve të kësaj familje.
Nëna me tre fëmijët e saj ishin kthyer për të hapur hotelin e tyre në Velipojë për sezonin turistik, kur një bombul gazi shpërtheu duke i lënë ata të plagosur rëndë, me djegie të shkallës së lartë.
Ata u dërguan për kurim në Itali, por 3 pjesëtarët e familjes u ndanë nga jeta, duke mos i mbijetuar plagëve të shkaktuara nga djegia.
Pak momente pas shpërthimit, nga ekipet mjekësore u raportua se pjesëtarët e familjes Gjoka kishin pësuar djegie nëmbi 80 % të trupit dhe gjendja e tyre vlerësohej tejet kritike.