Manjani: Nga politika të largon vota, jo Yuri Kim

“Nga politika të largon vota dhe vullneti personal, jo xhaketa. As mosha dhe as zonja Kim…”, shkruan ish-ministri i Drejtësisë, Ylli Manjani, duke thumbuar ambasadoren amerikane në Tiranë, Yuri Kim, e cila ka kërkuar nxjerrjen nga politika të ish-Kryeministrit Sali Berisha.

Manjani duke iu përgjigjur edhe atyre që flasin për xhaketa të vjetra, shkruan se përtej diferencave të moshës biologjike Sali Berisha, Edi Rama, Ilir Meta e shumë të tjerë, kanë të njëjtën kohë qendrimi në politikë.

“Prandaj ose këto janë gjithë në bllok xhaketa të vjetra dhe duhet të hapin krahun, ose s’ka kuptim që dikush u dashka të largohet e dikush tjetër jo, për shkak të konceptit “xhaketë e vjetër””, shkruan Manjani.

Postimi nga Ylli Manjani

Sa për kujtesë, atyre që artikulojnë teorinë e xhaketave të vjetra në politikë.

Përtej diferencave të moshës biologjike Sali Berisha, Edi Rama, Ilir Meta e shumë të tjerë, kanë të njëjtën kohë qendrimi në politikë.

LEXO EDHE  Tiranë/ Ishte shpallur i humbur, gjendet i pajetë

Në 1990 e kanë filluar aktivitetin politik dhe ende vijojnë, pavarësisht roleve që kanë apo intensitetit me të cilin bëjnë politikë. Madje, Edi Rama e Sali Berisha kanë një histori përplasje brenda PD në ditët e para të themelimit të saj… Gjithashtu Ilir Meta, Sali Berisha e Edi Rama kanë 30 vite që përplasen e pajtohen me njëri-tjetrin…

Këto janë fakte, jo llafe.

Prandaj ose këto janë gjithë në bllok xhaketa të vjetra dhe duhet të hapin krahun, ose s’ka kuptim që dikush u dashka të largohet e dikush tjetër jo, për shkak të konceptit “xhaketë e vjetër”.

Nga politika të largon vota dhe vullneti personal, jo xhaketa. As mosha dhe as zonja Kim…