I dërguari special i ish-Presidentit, Donald Trump, për dialogun Kosovë-Serbi, Richard Grenell, ka vizituar Tiranën gjatë fundjavës që lamë pas, ku ka takuar dhe kryeministrin Edi Rama.
Takimi mes tij dhe Ramës, vjen pas vizitës që Grenell pati edhe në Serbi, ku u shfaq duke u harbuar në klubet e natës me një prej ministrave serb.
Vetë Grenell e ka bërë publike vizitën e tij në Tiranë dhe takimin me Ramën përmes postimit të një fotoje në llogarinë e tij në Instagram duke e shoqëruar me shënimin:
“Tregime ngjarjesh gjatë një dreke të diele me mikun dhe kryeministrin shqiptar, Edi Rama – në Tiranën aq të nxehtë”.
Vizita vjen pak ditë pas takimit të radhës të minishengenit Ballkanik, ku tre prej vendeve, Kosova, Mali i Zi dhe Bosnja Hercegovina refuzuan që të merrnin pjesë.
Sa i takon arsyes së takimit me Ramën ajo nuk bëhet e ditur, dhe ndoshta nuk do ta kishim marrë vesh as që ka ndodhur, nëse nuk do të ishte vetë Grenell ai që do të publikonte foto.
Grenell tashmë është një gazetar, që pak javë më parë intervistoi Kryeministrin Rama, ndërsa më pas atakoi vendimin e DASH për përfshirjen e Sali Berishës në atë që konsiderohet si “lista e zezë”. Nuk dihet nëse vizita e tij, fillimisht në Beograd dhe më pas në Tiranë, ka lidhje me atë që Vuçiç dhe Rama e konsiderojnë si “Ballkani i hapur”, apo ish-diplomati që prodhoi jo pak debate gjatë kohës kur luajti rolin e të dërguarit të posaçëm, sot si qytetar i lirë, lobon për çështje të caktuara, qofshin politike ose jo.
