Nënkryetari i LSI-së Petrit Vasili, në një intervistë me gazetaren Eneida Ndoci, në Syri Tv, foli ndër të tjera edhe për Mini-Shengenin Ballkanik.
Vasili theksoi se Rama po mban një qëndrim si një armik ndaj Kosovës, duke tentuar që të dëmtojë interest kombëtare të shqiptarëve.
“Mini-Shengeni është një Jugosllavi e re, ku Ramën e vë nën kontrollin e Beogradit. Mes liderëve, del se Rama drejton Shqipërinë, duke shkatërruar ekonominë vendore. Shqipëria për nga ekonomia është shumë më rëndë sesa Maqedonia e Veriut, Serbia etj. Është hera e parë që Shqipëria ka kryeministër armik të Kosovës, që arrin deri që padit në gjyq Ramush Haradinajn, për marrëveshjen e kufijve, flet egërsisht ndaj Albin Kurtit. Kosova është në rregull e ka mbajtur qëndrim thellësisht dinjitoz. Raporti Kosovë-Shqipëri është raporti i shqiptarëve, që kanë vijë fiktive dhe nuk ia ndryshon as Rama dhe as çdo tradhtar i mundshëm. Asgjë nuk trondit dot raportet e Shqipërisë me Kosovën. Kjo tokë ka edhe tradhtar të egër dhe duhet të ikin, që të shkojmë drejt Europës”, tha Vasili.
Petrit Vasili nënvizoi se anëtarët e KLGJ-së dhe të KLP-së janë vënë në shërbim të qeverisë.
“OMN ka bërë disa gjetje të rëndësishme, për shumë anëtarë komisionesh, doli që kishin qenë në shërbim të Sigurimit të Shtetit, kishte që kishin probleme të rënda financiare. Rilindja i përbuzi këto dhe i bëri anëtarë të KLGJ, KLP-së. Rilindja ka ndërtuar gjithçka sipas qejfit. Anëtarët e KLGJ-së dhe të KLP-së janë vënë totalisht në shërbim të qeverisë. Bordi i OMN-së nuk ishte me jurist, ashtu siç kërkohej. Largimet nga vetingu janë bërë në mënyrë përzgjedhëse. Është dhunuar Kushtetuta dhe kemi proces që ka fermentuar totalisht, ndërkombëtarët janë bërë konformistë, aq sa Rilindja ka arritur që të poshtërojë deri të huajt. Kam frikë se vrulli revolucionar i vetingaxhinjve do bjerë shumë shpejt”, u shpreh Vasili.
