Anëtarja e Komitetit Teknik të Ekspertëve, Silva Bino konfirmoi se 6 nga 21 rastet e konfirmuara me variantin “Delta” në vend janë të vaksinuar, me një apo dy doza.
Bino zbuloi dhe vaksinat që kanë injektuar, ndërsa bëri me dije se pjesa dërrmuese e të prekurve me variantin indian kanë udhëtuar jashtë vendit. E pyetur nga gazetarët, ajo saktësoi se 13 të infektuarit kishin krijuar vatra familjare.
“Janë 6 raste që kanë qenë të vaksinuar, 2 të vaksinuar me AstraZenca në Mbretërinë e Bashkuar, dy të tjera kanë qenë me 1 dozë të Pfizer në Gjermani, 2 raste të tjera kanë qenë të vaksinuar me Coronavac”, tha Bino.
“Pavarësisht rasteve, ajo që ka rëndësi për tu theksuar është se asnjë prej rasteve nuk kanë pasur nevojë për trajtim spitalor. Në spitale po rritet numri i të rinjve që kanë nevojë për kujdes spitalor, a po ndodh kjo te ne? Akoma jo! Planifikimin për një dozë të tretë jo vetëm për vaksinën Coronovax është duke u marrë në konsideratë nga grupi i ekspertëve. Testi i antitrupave nuk është një gjë që rekomandohet për të matur nivelin e antitrupave. U them qytetarëve që të vaksinohen dhe të ruhen, të mos rendin për të matur nivelin e antitrupave”, shtoi ajo.