1 kg kokainë e sekuestruar dhe 4 në pranga/ I dyshuari përplas makinën e policisë dhe tenton të nxjerrë armën nga brezi (VIDEO)

Katër persona janë arrestuar nga policia e Durrësit, që ka sekuestruar rreth 1 kg kokainë, 1 armë zjarri dhe municion luftarak. Gjatë aksionit të ndalimit të dy prej tyre, një prej të dyshuarve ka përplasur makinën e policisë dhe ka tentuar të nxjerrë armën e zjarrit që e mbante me vete.

Arrestimet

Të arrestuarit janë:

  • Arian Plaku, 46 vjeç, banues në Durrës, i dënuar më parë për veprën penale “Prodhimi dhe shitja e narkotikëve”;
  • Edmond Gjyzeli, 37 vjeç, banues në Durrës.
  • Ilir Peraj, 52 vjeç, banues në Tiranë, i dënuar më parë për veprat penale “Vrasja” dhe “Mbajtja e ambienteve për prostitucion”.
  • Stavri Marku, 60 vjeç, banues në Tiranë.

Arrestimi i tyre u bë bazuar në informacionet e siguruara në rrugë operative për implikimin e këtyre shtetasve në veprimtarinë kriminale të shitjes së lëndëve narkotike në Durrës, sqaroi policia.

Sipas të njëjtave burime: Fillimisht, shërbimet e Policisë, rreth orës 14:15, në vendin e quajtur “Nënkalimi i Urës së Dajlanit”, kanë ndaluar mjetin tip “BMW’, me drejtues Edmond Gjyzelin dhe pasagjer Arian Plakun. Gjatë kontrollit në mjet, në pjesën e poshtme të sediljes, efektivët gjetën dhe sekuestruan në cilësinë e provës materiale 1 kg e 63 gr lëndë narkotike të dyshuar kokainë. Në momentin e ndalimit, gjatë kontrollit fizik, Gjyzelit iu gjet në brez një armë zjarri pistoletë me 14 fishkë. Ai, gjatë ndalimit të mjetit nga forcat e Policisë, ka goditur automjetin e agjentëve të Forcës së Posaçme Operacionale me automjetin e tij dhe gjatë arrestimit ka tentuar të nxjerrë nga brezi armën e zjarrit.

LEXO EDHE  Ishin nisur me pushime në jug, ja si shpëtoi familja nga flakët e makinës në Vlorë (Video)

Gjithashtu, në vijim të operacionit, në lagjen nr. 13, Plazh-Durrës, u arrestuan në flagrancë shtetasit: Ilir Peraj, 52 vjeç, banues në Tiranë, i dënuar më parë për veprat penale “Vrasja” dhe “Mbajtja e ambienteve për prostitucion” dhe Stavri Marku, 60 vjeç, banues në Tiranë, pasi janë të dyshuar si të implikuar në këtë veprimtari kriminale.

Në cilësinë e provës materiale u sekuestruan 1 kg e 63 gr. lëndë narkotike e dyshuar kokainë, 1 armë zjarri pistoletë me 14 fishekë, 4 aparate celular dhe 2 automjete.

Ndaj të ndaluarve rëndojnë akuzat për veprat penale “Prodhimi dhe shitja e narkotikëve” dhe “Armëmbajtja pa leje”.