200 mijë euro për rrugën e inceneratorit të Fierit, Subashi tërhiqet pas investigimit të Boldnews

Nga Boldnews.al

Kryetari i Bashkisë së Fierit, Armando Subashi, është tërhequr nga tenderi për rregullimin e rrugëve të inceneratorit të Fierit, të ndërtuar në fshatin Verri.

BoldNews investigoi disa ditë më parë këtë çështje, duke sjellë dokumente sesi Bashkia e Fierit po shpenzonte plot 200 mijë euro për ndërtimin e disa rrugëve që kalojnë në afërsi të këtij impianti, të fituar nga një firmë private me koncesion.

Frika e një hetimi të mundshëm të SPAK ka sjellë këtë tërheqje të kreut të bashkisë, i cili u denoncua publikisht edhe nga deputeti socialist i Fierit, Petro Koçi.

Por, tërheqja e bashkisë është edhe një sinjal alarmi, pasi vetë Subashi e ka pranuar se me këtë investim do të ndihmohej privati. Por, a e dinte z.Subashi që rruga në fjalë ishte për inceneratorin? Përse u tërhoq në këto momente?

Faksimile: Dokumenti në Agjencinë e Prokurorimit Publik, i shpallur nga Bashkia e Fierit që njofton tërheqjen nga ky tender
Faksimile: Dokumenti në Agjencinë e Prokurorimit Publik, i shpallur nga Bashkia e Fierit që njofton tërheqjen nga ky tender

BoldNews ka ndjekur në vijimësi këtë procedurë tenderimi. Dhe kur pritej shpallja e fituesit, apo hapja e zarfeve, Subashi është tërhequr në mënyrë të beftë, duke pranuar edhe gabimin.

Sipas dokumentit të mësipërm, në pikën 5 të tij thuhet se “anulimi erdhi për arsye të interpretimit kontraktual përkatës, sipas kërkesës së bërë autoriteteve kopetente, nëse financimi dhe realizimi i këtij projekti mund të realizohet nga autoriteti kontraktor Bashkia Fier ose jo”.

LEXO EDHE  Aksidenti tragjik me 10 viktima, Rama: çfarë fatkeqësie pikëlluese

Pra, vetëm pas publikimit të investigimit të BoldNews, Subashi ka kërkuar anulimin dhe dërgimin e projektit te institucioni që ka dhënë kontratën koncesionare për inceneratorin e Fierit. Sipas dokumenteve, Bashkia e Fierit kishte hapur një tender me objekt “rikonstruksion i segmentit të rrugës hyrja Kallm – Incenerator dhe segmenti Kryqëzimi – Qendër Kallm”.

Faksimile: Tenderi i hapur disa javë më parë dhe specifikimet që përcaktonin se rruga është për inceneratorin

Nga hulumtimi rezultoi se rrugët që do të bëheshin kalojnë, apo janë “private” të koncesionarit të inceneratorit. Vlera e këtij tenderi është 20.397.004 lekë, ose mbi 200 mijë euro me TVSH. Një “ndihmë” e madhe në këtë situatë, ku koncesionarit duket se i kishin mbaruar paratë.

Në dokumentet e këtij tenderi ka edhe specifikime se çfarë do të behet. Dhe, rezulton se janë pikërisht rrugët lidhëse dhe në afërsi të kësaj vepre që po ndërton Subashi.

Dhe, në atë investigim ngritëm disa pyetje: Nëse Tushe i Lushnjes u arrestua për një tender kanali, përse Subashi ka dorë të lirë në koncesione apo ndihmon këto firma?

A mos ndoshta mes Subashit dhe Tushes ka pasur konflikt për mbetjet? A janë kërkuar mbetjet e Lushnjes të dërgohen në këtë incenerator? Pyetje që janë akoma pa përgjigje, pavarësisht tërheqjes së Subashit.

200 mijë euro për rrugët që duhet të ndërtonte koncesionari/ Subashi “ndihmon” Inceneratorin e Fierit