VIDEO/ Lë timonin dhe hipën mbi makinën në lëvizje, merr 600 mijë lekë gjobë, i bllokohet patenta dhe mjeti

Video e publikuar nga një i ri, ku shihet teksa lë timon dhe hipën mbi baxhanë e makinës në lëvizje, ka sjellë ndëshkimin e tij me gjobë dhe i është bllokuar mjeti e patenta.

Protagonisti është një 34-vjeçar nga Tepelena.

“Shërbimet e Policisë Rrugore, duke marrë shkas nga publikimi i një videoje në rrjetet sociale, ku shfaqej një drejtues automjeti që kryente manovra të rrezikshme në rrugë, kanë identifikuar dhe shoqëruar në ambientet e Policisë, shtetasin A.K., banues në Tepelenë. Ky shtetas, më datë 17.07.2021, rreth orës 13:00, në rrugën e brendshme të fshatit Dragot, Tepelenë, ka kryer manovra të rrezikshme në rrugë duke drejtuar mjetin tip ‘Volkswagen’. Për këtë shtetas është vendosur masa administrative 60.000 lekë të rinj, me sanksion plotësues ndalim administrativ i mjetit dhe tërheqje e lejes së qarkullimit për manovra të rrezikshme në rrugë, mosndryshim të pronësisë së mjetit brenda afatit dhe mosshlyerje të masave administrative brenda afatit ligjor”, njoftoi policia.

LEXO EDHE  Mbytet një pushues në Tale të Lezhës

Policia apelon për respektim të rregullave të qarkullimit rrugor, për përgjegjshmëri e përgjegjësi për sigurinë e jetës gjatë drejtimit të automjetit, duke paralajmëruar se cilido që do shkelë rregullat e qarkullimit apo do kryejë manovra të rrezikshme në rrugë, që cenojnë rëndë sigurinë rrugore do përballet me Policinë, në zbatim të plotë të Kodit Rrugor. Policia po ashtu fton cilindo që të denoncojë pa hezitim çdo paligjshmëri.